Татар теле һәм әдәбияты атналыгы кысаларында  “Яздан аерып булмый Тукайны” дип исемләнгән күргәзмә оештырылды.  Күргәзмәдә шагыйрьнең рәсеме, аның китаплары, Тукай иҗатына багышланган  газета, укучылар ясаган рәсемнәр урын алды.

25 нче апрель көнне  укучылар мәктәп тирәсен чистарттылар, территориягә яшь агачлар утырттылар. Агач утырту эшендә Курса урманчылыгы җитәкчесе Гыйләҗиев Ф.Т. һәм һ.б. хезмәткәрләр дә катнашты. Алар укучыларга агач утырту тәртибен аңлаттылар, үзләренең тәҗрибәләре белән уртаклаштылар. Барлыгы 130 төп юкә һәм миләш агачы утыртылды. 

Башлангыч сыйныф укучылары «Ләйсән” балалар бакчасы белән даими элемтәдә торалар. Бүген, Габдулла Тукай туган көнне билгеләп үтү уңаеннан, “Тукай безнең белән” дип исемләнгән кичә үткәрелде. Укучылар Тукай шигырьләрен сөйләделәр, җырладылар, биеделәр. Г.Тукай шигырьләрен иң оста сөйләүчеләргә грамоталар тапшырылды. Бәйрәмнең икенче кисәге чәй өстәле артында дәвам итте. Балалар бакчасы коллективы укучыларны бу җиңүләре белән котлады.        

И моңлы, нурлы Тукай. 

Бүген Арчада Тукай шигырьләрен сәнгатьле сөйләү буенча конкурс уздырылды. 6 нчы класс укучысы Солтанова Камилә "Сәнгатьле уку" номинациясендә катнашкан өчен сертификат белән бүләкләнде. Ә нәтиҗәләр 27 нче апрель көнне ясалачак.

Дөньяда иң кирәк нәрсә- саулык, сәламәтлек. Ә сәламәтлекнең дусты - спорт. Безнең зонада урнашкан барлык мәктәп укучылары да спортны, бигрәк тә волейболны аеруча үз итәләр. Бүген мәктәптә Сеҗе, Сикертән мәктәпләреннән килгән егетләр һәм кызлар арасында волейбол ярышы уздырылды. Егетләр арасында беренчелекне Сеҗе командасы яуласа, кызлар командасы арасында Урта Курса мәктәбе кызлары көчлерәк булып чыкты. Уеннар "Язгы игелек атнасы" кысаларында дуслык җепләрен ныгыту, тагын да үстерү максатыннан уздырылды. 

 23 апрель көнне мәктәп китапханәсендә укучылар яңа матур әдәбият китаплары белән таныштылар, мәрхәмәтлелек турында әкиятләр, шигырьләр укыдылар.  Әдәбият елы уңаеннан иншалар, эсселәр язу өчен укучыларга  темалар тәкъдим ителде.

Бүген 4 нче класс укучылары өчен чираттагы сынау үткәрелде. Алар рус теле фәненнән мониторинг тапшырдылар.

Бүген укучыларга Бөек Җиңү көненең символы - Георгий тасмасы турында тирән мәгълүмат бирелде. Тарих укытучысы Шәфигуллин Н.Ф. әлеге тасманың тарихы, аның төсләре, бүгенге көндәге роле турында сөйләде. Җиңү яулап алучыларга карата хөрмәт йөзеннән укучылар үзләре дә бу тасмаларны тактылар.

"Язгы игелек атнасы - игелекле эшләр эстафетасы" акциясе кысаларында классларда дуслык, тынычлык темасына әңгәмәләр уздырылды.