Бүген мәктәбебездә "Финансирование научных и образовательных программ безопасности дорожного движения" дәүләт учреждениесының Актаныш бүлекчәсе җитәкчесе Р.З.Саетова, эчке эшләр бүлегенең балигъ булмаган балалар белән эшләү инспекциясе җитәкчесе А.А.Ахунова, юл хәрәкәте күзәтчелеге инспекторы И.Имамразыев кунакта булып, балалар белән юл хәрәкәте куркынычсызлыгы  кагыйдәләре буенча  төрле  кызыклы уеннар,  викторина оештырдылар. Балалар 3 командага бүленеп  ярышларда көч сынаштылар, сорауларга җаваплар эзләделәр. Кунаклар  елдагыча  бик күп бүләкләр белән килгәннәр. Балаларның һәрберсенә йомшак уенчыклар, уенчык машиналар, киемгә тагыла торган саклык билгеләре, уку-язу әсбаплары,мәктәбебезгә юл хәрәкәте кагыйдәләрен чагылдырган брошюра-китаплар, газеталар, төсле цифрлы фотоаппарат, электрон сәгать, модем бүләк иттеләр. Мәктәп дирекциясе әлеге изге гамәлне оештыручыларга  чын күңелдән ихлас рәхмәтләрен җиткерә!

   Һәр елдагыча, бу уку елында да мәктәбебездә укучы балаларның туган көннәрен билгеләү кичәләре булып узды. 01.12.11.-06.12.11. көннәрендә I-IV группа укучылары  җәй һәм көз айларында туучыларның туган көн кичәләрен бәйрәм иттеләр. Туган көн кичәләре чын  бәйрәм рухында узды: иҗади сценарийлар буенча  барган  кичәләрдә төрле кызыклы, мавыктыргыч уеннар да, концерт номерлары да булды. Кичәләр дәвамында изге теләкләр юлланды, күчтәнәч-бүләкләр бирелде.

18 нче ноябрь көнне мәктәбебездә матур гадәткә кергән йола-корбан бәйрәмендә күчтәнәч итеп китерелгән корбан итләреннән авыз итү мәҗлесе оештырылды. Мәҗлескә раоныбызның имам-мөхтәсибе Руслан хәзрәт, авылыбызның имам-хатыйбе Яхъя хәзрәт, барлык укучылар, лаеклы ялдагы һәм коллективтагы барлык хезмәткәрләр чакырылды. Руслан хәзрәт корбан бәйрәменең тарихына тукталды,  укучыларга табын әдәбе һәм гомумкешелек сыйфатлары турында вәгазь укыды.

  Бүген мәктәбебезнең 13 педагогы  Мәскәү Социаль Гуманитар Институтының Казан  шәһәре филиалында  өстәмә дефектологик белгечлек буенча диплом яклап кайттылар. Мәктәп коллективы шушы уңайдан аларның барсын да бу уңышлары белән ихлас котлый, киләчәктә хезмәтләрендә зур уңышлар, ныклы сәламәтлек тели.

  Бүген   уку елының II чиреге башланды. Тәрбия сәгатьләре вакытында  балаларның каникулны ничек үткәрүләре турында җанлы әңгәмәләр, мәктәп автобусы белән кайту һәм килүнең уңайлыклары, өстенлекләре турында  сөйләшү булды. II чирек дәвамында буласы  чаралар турында фикер алышуларда  барлык балалар да катнашты.

       Мәктәбебезнең  3 педагогы  Яр Чаллы  шәһәре   педагогия  институтына   дефектологик белгечлек буенча  укырга кереп, сессияләрен уңышлы тапшырып кайттылар.

      Бу уку елында балалар өчен сан-гигиена һәм сәламәтлек саклау темасына багышланган укулар үткәрү матур традициягә әйләнде. Һәр атнаның җомга көнендә  шәфкать туташлары  И.Ш.Нәбиева һәм Х.Н.Хайбуллина планлы рәвештә сан-гигиена таләпләрен үтәүнең әһәмияте, сәламәтлекне саклау, төрле авыруларны кисәтү чаралары турында балаларга  җентекләп  аңлаталар.
       Бүген укуларның чираттагысы "Яшүсмер кызлар гигиенасы" темасы астында узды.

    Бүген мәктәбебезнең физкультура укытучысы, республика чемпионнары әзерләп мәктәп данын еракларга таныткан шәхес-Нәсим Әхмәдулла улы Сибгатуллин үзенең  олуг юбилеен 60 яшен каршылый.

     Хөрмәтле хезмәттәшебез Нәсим Әхмәдулла улы! Гомер бәйрәмегез белән тәбрикләп Сезгә ныклы сәламәтлек, шатлык-куанычлар, гаилә бәхете телибез. Тормыш юлыгыз , йөрер юлларыгыз һәрвакыт имин булсын, балаларыгызның, оныкларыгызның бәхетенә сөенеп яшәргә язсын.

  Сез әле солдаттан кайткан

Егетләр кебек кенә!

Алтмышның аргы ягында

Яшәгез көлеп кенә,

Алтмыш еллык хәзинәнең

Кадерен белеп кенә.

                                                                                          Ихтирам белән хезмәттәшләрегез.

        Мәктәбебезнең 2010-2011 уку елы буенча иң алдынгы, тырыш, сәләтле, төрле конкурсларда җиңүче укучылары  бүген Актанышка экзотик хайваннар күргәзмәсенә бардылар.Дәреслекләр аша гына таныш булган  хайваннарны күреп гаҗәпләнделәр, ташбака, елан, крокодилларны хәтта тотып карадылар.  Экскурсовод Хаҗиева Наилә апаларының  җир-су хайваннарының һәрберсе  турында кызыклы, мавыктыргыч сөйләвен йотлыгып тыңладылар.Хайваннар  янында балалар истәлеккә фотога  төштеләр.Иң мөһиме-кәеф күтәренкелеге, рухи азык алып кайттылар, шатлыклы тәэсирләре белән уртаклаштылар.