Бүген мәктәпкә әзерлек "В" төркеме балалары мәктәп, андагы мөхит, укытучылар белән танышу максатыннан, тәрбияче апалары Мәзнәвиева М.Р. һәм Исламова З.З. җитәкчелегендә 2 нче  мәктәпкә экскурсиягә бардылар. Балалар парта артына утырып, чын укучылар кебек кызыклы биремнәр чиштеләр, уеннар уйнадылар. Булачак укытучы апалары әйткән мәсьәләләргә җавап эзләделәр. Соңыннан спорт залында спорт уеннары уйнап күңел ачтылар. Китапханәдә балалар китаплары белән танышып, үзләренә бик кызыклы һәм файдалы мәгълүмат тупладылар. Безне җылы каршы алганнары өчен мәктәп коллективына зур рәхмәтләребезне җиткерәбез, иҗади уңышлар телибез!

Экология мөһим мәсьәләләрнең берсе булып тора. Ул үзенең актуальлеге белән бүген бөтен кеше алдына килеп басты. Табигатьнең киләчәге, бөтенлеге кеше кулында. Экология проблемасының үзебез яши торган җирдә тирәлектә дә чагылуы без- тәрбиячеләрдә  борчылу тудыра һәм төрле педагогик эшчәнлеккә этәрә. Мәктәпкәчә яшьтәге балаларга аеруча кызыксынучанлык хас. Алар  бигрәк тә  табигатькә игътибар итәләр.Табигатьне күзәтү, аны өйрәнү, сакларга омтылу- балаларның рухи дөньясын баета, уйларга өйрәтә. Шуның өчен балалар бакчасында тирә-якны өйрәнү, табигатькә сакчыл караш, экологик тәрбия зур урын алып тора.

Бүген 15 апрель - "Экология көне" уңаеннан, балалар белән табигатьне саклау, терек табигатькә карата сакчыл караш тәрбияләү турында әңгәмәләр үтте.

Ә менә бакчабызның иң кечкенә ясле төркеме балалары, кояшның якты нурлары астында җылылык эзләп йөргән күбәләкне күзәттеләр.Һәм бөҗәкләргә тияргә ярамаганлыгы турында тәрбияче апалары Гардиева. Г,Р. ның сөйләвен тыңладылар.

Юрий Гагарин- 
Исеме аның. 
Ул хәбәр итә 
Биектән барын: 
Таулар, елгалар, 
Шәһәрләр күркәм: 
Дала һәм кырлар 
Ямь – яшел үлән.

Бүген физкультура инструкторы Зөлфия Зәет кызы Чаллы шәһәрендә семинарда тәҗрибә уртаклашып, яңалыклар алып кайтты. 75 нче "Гвоздика" балалар бакчасы базасында, "ФДББСка нигезләнеп физкультура-сәламәтлек саклау эшчәнлеген модельләштерү" темасы астында үткән әлеге семинарда тәрбиячебез яңа уен алымнары, дидактик уеннар, мастер-класслар һәм шөгыльләр карап, үзенә тәҗрибә туплап кайтты. 

Мәктәпкәчә һәм башлангыч белем бирүнең дәвамчанлыгы бик матур күренеш. Һәм әлеге дуслык җепләрен ныгыту максатында мәктәпкә экскурсияләр оештырыла. Бу сәфәр мәктәпкәчә яшьтәге балалар алдында тиздән аларның үсеп, яна "уку йорты"на барачакларын аңларга ярдәм итә.

Балаларны мәктәпкә психологик яктан әзерләү кысаларында мәктәпкә әзерлек "Б" төркеме балалары Актанышыбызда урнашкан 2 нче мәктәптә булдылар. Мәктәптә алар үзләрен чын укучылар итеп хис итә, уку сыйныфында парта артына утырып, тактада яза һәм укытучының сорауларына җавап бирә алдылар. Физкультура залында булдылар һәм инглиз теле кабинетларында укучыларның дәрестә ничек шөгыльләнүләрен күрделәр. Шулай ук балалар  китапханәдә кызыклы китаплар, энциклопедияләр белән таныштылар. Бүгенге сәфәрдән балалар зур тәэсирләр алып кайттылар. Алар балалар бакчасына кайткач, тизрәк мәктәпкә укырга барасы килүләрен сөйләделәр.

Безне җылы итеп каршы алган 2 нче мәктәп коллективына зур рәхмәтләребезне җиткерәбез.

Балаларны язгы үзгәрешләр белән таныштыруны дәвам итәбез. Тәрәзә төбендә тәҗриҗрибә ясау, күзәтү максатыннан  мәктәпкә әзерле Б төркемендә йөрүче балалар кечкенә савытларга бодай, борчак, арыш чәчтеләр, суган утырттылар.  Балалар үзләре су сибә. Көн дә килү белән үсентеләрне күзәтәләр. Үтәкүренмәле савытта үсентеләрнең тамырлары да күренә. Суган кыяклары озын булып үскәч,  көндезге ашны балалар тәмле яшел суган белән ашады. Тал песиен  балалар аеруча яратып күзәтә.

Балалар бакчасында сулыш алу гимнастикасы һәркөнне үткәрелә.. Әлеге күнегүләр җыелмасы балаларның иммунитетын ныгыта. Галимнәр әйтүенчә, әгәр дә төркемдә  гиперактив балалар булса, әлеге күнегүләрдән соң киеренке халәт туа һәм алар тынычланалар. Бүген урамда яз икәнен исәпкә алып, мәктәпкә әзерлек төркеме балалары тәрбияче апалары Чулпан Дәниф кызы белән суда кечкенә көймәләр йөздерделәр. Һәм балалар сулыш тутырып өргән саен көймәләрнең төрле якка йөзүләре аеруча да кызыклы булды. Балалар яз турында белемнәрен  ныгыттылар һәм бер үк вакытта сулыш алу гимнастикасын  көймәләр йөздерү уенында бик отышлы кулландылар.

 Бүген "Тылсым" мәктәп-бакчасы базасында район балалар бакчаларының  рус теле тәрбиячеләре методик берләшмәсенең чираттагы утырышы узды. Әлеге очрашуда рус теле тәрбиячесе Сабирова Э.Р., тәрбияче-логопед Гараева А.И. катнашып, балалар бакчасының эш тәҗрибәсе белән уртаклашып кайттылар. 

Тәрәзәдән язгы кояш карый башлау белән, барлык төркемнәрдә дә "тәрәзә төбе бакчасы" булдырылды. Балалар һәрберсе савытларына тамгалар куеп, суган утырттылар. Инде тәрәзәдән төшкән назлы кояш нурларында гына иркәләнеп үскән суганнар хәйран гына "уңыш" та бирергә өлгерделәр. Бүген  әлеге яшел кыякларны җыеп, ашка салып, зурлар төркеме балалары  тәмләп аш ашадылар. Үзең үстереп ашагач, тәмле була икән ул! 

Балачак әкиятләре һәрберебезнең хәтеренә уелып калгандыр, мөгаен. Кечкенә чактагы китаплар үзләренең геройлары, җете сурәтләре белән олыгайгач та күз алдыннан китми. 

Уртанчылар төркеме балалары да китапларны карарга, әкиятләр һәм шигырьләр сөйләргә бик яраталар. Шушы көн уңаеннан тәрбияче Эльвира Бәһрәм кызы китапханәдән кунак чакырды. Китапханәче Лилия апалары китапханәгә кайткан яңа китаплар белән балаларны таныштырды. Балалар исә кунагыбызга үзләренең матур шигырьләрен, җырларын бүләк иттеләр.

Бүгенге очрашудан балалар үзләренә китап турында бик тә кызыклы һәм бай мәгълүмат тупладылар.