Апрель ае - шигърият ае. Гимназиябездә шигъри кичәләр дәвам итә. Район үзәк балалар китапханәсе китапханәчеләре Резеда Әхмәтова, Ильмира Фәрхтдинова I сыйныф укучылары белән, Йолдыз Шәрапова иҗаты буенча, кичә бик күңелле, җылы очрашу оештырдылар. Укучылар озынайтылган көн төркемендә шагыйрәнең иҗаты белән таныштылар, үзләренең күңелләренә хуш килгән шигырьләрне яттан сөйләделәр. Балалар үзләре ясаган рәсемнәрдән күргәзмә дә оештырылды. Очрашуда китапханәчеләр укучыларга шәхси бердәм уку билетлары тапшырды. Китапханәдә һәр укучыны да көтеп калуларын белдерделәр. 

Гимназиябезнең "Ялкын" балалар оешмасының "Светофорик" отряды бүген "Куркынычсыз тәгәрмәч - 2022" район бәйгесендә катнаша. Уңышлар сезгә, балалар!

Якташыбыз -Татарстан Республикасының Дәүләт Киңәшчесе Минтимер Шәймиев мәдәниятебез турында: «Мәдәният – халыкның җаны, ул буыннарны бәйләп тора торган зирәклек һәм гореф-гадәтләр. Без үз мәдәниятебез белән көчле. Ул безне бердәм халык һәм бердәм ил итеп саклый. Күпмилләтле мәдәниятебезне үстергәндә һәм саклаганда гына, аны беркем дә юкка чыгара алмаячак».

Гимназиябезнең инглиз теле укытучысы Фәйрүзә Филарис кызы Ганиева, тарих һәм җәмгыять белеме укытучысы Рәмис Илгиз улы Хәсәнов, директор урынбасары Юлия Валентиновна Әмирҗанова бүген Казан шәһәрендә эшлекле сәфәрдә. Татарстан Республикасы Хөкүмәтенең “Алгарыш” гранты кысаларында әңгәмәдә катнаша алар. Уңышлар сезгә!

Бүген безне Актаныш Балалар иҗат үзәгенең "Образ" бию студиясе сәламли! Шушы көннәрдә генә мәртәбәле җиңүгә иреште - "Уфа талантлары" халыкара фестиваль-конкурсында 2 урын яулады алар. Гимназиябезнең яшь биючеләре - Закирова Алмазия, Госманова Амелия (2а сыйныфы), Хисмәтуллин Тимерлан (3а сыйныфы), Хөҗҗәтова Камиләне (6б сыйныфы) әлеге җиңүләре белән котлыйбыз. Молодцы, балалар!

Актаныш мәдәният йортында бүген куелган спектакль - Ләйсән Әминованың "Хушлашырга ашыкма..." лирик комедиясенең премьерасы. Комедиянең күңелле дә, моңсу да дулкыны зал тутырып килгән тамашачыны елмайтты та, көлдерде дә, елатты да - комедиядә баручы дөньяда яшәде тамашачы.

Актаныш район башлыгы призына үткәрелгән татарча көрәш турнирында 2 урын алган 4а сыйныф укучысы Салих Әнвәровны җиңүе белән котлыйбыз. Молодец, Салих!

Актаныш Актаныш район башлыгы призына үткәрелгән татарча көрәш турнирында 3 урын алган 6в сыйныф укучысы Инсаф Газизовны җиңүе белән котлыйбыз. Молодец, Инсаф!

«Созвездие-Йолдызлык 2022» фестивале суперфиналының икенче турында катнашып, 9а сыйныфы укучысы Гөлия Заһертдинова (җитәкчесе Сиринә Исламова) "Пирамида" күңел ачу комплексында узачак гала-концертта катнашу өчен юллама алды. Гөлия, сине ихластан котлыйбыз!

Кадерле дусларыбыз, укучыларыбыз! Хөрмәтле ата-аналар, дәү әти-дәү әниләр! Яраткан укытучы-тәрбиячеләребез! 20 апрель көнне 15.00 сәгатьтә гимназиябезнең актлар залында Татарстан Республикасы мөселманнарының Диния Нәзарәте башлыгы, мөфти Камил хәзрәт Сәмигуллин белән вәгазь кичәсе була. Рәхим итегез! Сезне көтеп калабыз! Безнең белешмә. Камил Искәндәр улы Сәмигуллин–мөселман дин әһеле, мөфти, Коръән-хафиз, хәнәфи мәзһәбе галиме. Татарстан Республикасы мөселманнары Диния нәзарәте рәисе, Казанның «Мөхәммәдия» мәдрәсәсе директоры, Россия ислам институты мөгаллиме, Әбү Хәнифә һәм әш-Шәфигый аша Мөхәммәд пәйгамбәргә барып тоташа торган белемнәр чылбырына ия. Татарстан тарихындагы иң яшь мөфти. Джиу-джитсу буенча спорт мастерлыгына кандидат, куе кызыл билбау иясе.