Бүген база балалар бакчалары арсында "Ел тәрбиячесе" һөнәри бәйгесенең район этабына сайлап алу туры үтте. Бәйгедә Әҗәкүл балалар бакчасыннан Гөлназ Ринат кызы,Куян балалар бакчасыннан Эльвира Васим кызы, Уразай балалар бакчасыннан Дания Әскатъ кызы һәм үзебезнең бакча тәрбиячеләре көч сынашты. Балалар бик кызыклы һәм файдалы тәҗрибәләр үткәрделәр, экологик белемнәрне тулыландырдылар һәм рус телен камилләштерделәр. Һөнәри бәйгенең әлеге өлешен уңышлы үткән педагогларыбызны чын күңелдән тәбрик итәбез!!!

Балалр бакчасында тәрбия һәм белем бирү эшен әти-әниләрдән башка күз алдына китереп булмый. Тәрбия бирүнең нәтиҗәле булуы – әлбәттә, балалар бакчасының әти-әниләр берлектә эш алып барылуында. Балаларны тәрбияләүдә төп җаваплылык әти-әни өстендә, ә без – тәрбиячеләр тәрбия эшчәнлегендә булышырга, якларга, юнәлеш бирергә тиешбез. Шуларны истә тотып, бакчабызда әти-әниләр һәм балалар белән күмәк эш алып баруга өстенлек бирелә. Әлеге максатларны күз алдында тотып бүген зурлар төркеме әти-әниләренә ачык шөгыльләр күрсәттек.

Таңнарда гармун уйнадың

Тирә-як тынып калды.

Гармун моңына тирбәлеп

Гөлләрдән чыклар тамды.

Бүген Россия күләм Гармунчылар көнен билгеләп үтелә. Күңелләргә чиртеп өздереп уйнаучылар елдан ел кими бара. Әмма бакчабызның музыка җитәкчесе, оста гармунчыбыз Хәнис Хәмзәнур улы балаларыбызда кечкенәдән үк музыка уен коралларына мәхәббәт тәрбияләүгә зур урын бирә.

Бүген Хисапчылар үзләренең һөнәри бәйрәмнәрен билгеләп үтәләр. Шул уңайдан бакчабызның зурлар төркеме үзәк бухгалтерия хезмәткәрләрен бәйрәм белән котлап кайттылар. "Безнең бакчада акча әйләнеше сезнең фидакарь хезмәтегез нәтиҗәсендә туплана һәм көйләнә. Сез бакчабыз хезмәткәрләренә, яраткан тәрбияче апаларыбызга бер тоткарлыкларсыз хезмәт хакы түләргә, исәп-хисап эшләрен башкарырга мөмкинлек тудырасыз. Хезмәтегез сездән зур төгәллек һәм аралашу осталыгы таләп итә. Шуңа да сезгә ихтирамыбыз һәм ышанычыбыз зурдан. Киләчәктә дә, үз хезмәтегезгә тугры калырга, алга куелган бурычларны намус белән үтәргә язсын", дип үзләренең изге теләкләрен җиткерделәр.

Кыш хәбәрен ишеттереп,

Кырыс җил исеп китте.

Язга кадәр саубуллашып

Кошлар да күчеп китте.

Балаларда табигатьтәге үзгәрешләрне күзәтү, көзге табигать һәм кошлар турындагы белемнәрен ныгыту, бәйрәм рухы тудыру максатыннан уртанчылар төркеме балалары "Хушыгыз, кошкайлар!" бәйрәм иртәсен тәкъдим иттеләр. Матур шигырьләр, күңелле җырлар белән беррәттән балаларның җитезлекләрен, игътибарлылыкларын сынау максатыннан хәрәкәтле уеннар, кышлаучы һәм күчмә кошларны тануга юнәлдерелгән интерактив уеннар бәйрәмне тагын да тулыландырып җибәрде.

11 ноябрь - Бөдендөнья оригами көне буларак билгеләп үтелә.

Классик оригами бер квадрат кәгазь битеннән кайчы кулланмыйча гына төзелә. Япониядә оригами өчен гадәттә "васи" дип аталган югары сыйфатлы традицион кәгазь кулланалар, ләкин катлаулы булмаган модельләр өчен иң гади кәгазь туры киләчәк.  Оригами көне-кәгазьдән матур фигуралар җыю өчен иң яхшы көн.  Менә безнең балалар да оригами ысулы кулланып төрле сыннар ясадылар: Балык, чәчәк, кош, мәче, куян, аю, төлке, бака, тычкан, эт һ. б. Шакмаклы кәгазь кисәге бөкләү бармакларының җитезлеген, вак моториканы үстерүгә иң яхшы шөгыль.

10 ноябрь - Россия Федарциясе Эчке эшләр органнары хезмәткәрләре көне. Көндез һәм төнлә хокук тәртибен саклаучы, яшәүчеләрнең законлы мәнфәгатьләрен яклаучы, җәмгыятьнең яхшы социаль хәлен һәм кәефен булдыручы батыр йөрәкле полиция хезмәткәрләрен мәктәпкә әзерлек төркеме балалары һөнәри бәйрәмнәре белән котлап кайттылар!!!

Балаларның сөйләм үсеше һәм нәфис сүз белән кызыксынуларын үстерү, шигьри сүзнең матурлыгын һәм аһәңен тоя белү максатыннан Бөтендөнья татар конгрессы тарафыннан үткәрелүче "Җәлил укулары" Халыкара әдәби бәйгесенең балалар бакчасы этабын үткәрдек.  Муса Җәлилнең шигырьләрен яттан сөйләп 52 бала бәйгедә көч сынашты. Аларның иң-иңнәре зона этабында катнашу хокукы алды. Нәни шигырь сөюче дусларыбызга бәйгенең алдагы этапларында да уңышлар теләп калабыз.

4 ноябрь – Халыклар бердәмлеге көне. Күпмилләтле халкыбыз – гасырлар дәвамында үзара татулык нәтиҗәсендә барлыкка килгән, дөньяда тиңе булмаган зур куәт. 2005 елдан башлап билгеләнүче әлеге дата Русиянең яңа тарихында, бер яклап, Октябрь бәйрәмен алыштырды, икенчедән, дәүләтнең нигезен тәшкил итүче мөһим гомумкешелек кыйммәтләре тупланган иң олы бәйрәмнәрнең берсенә әверелде. Бакчабызда әлеге истәлекле көн уңаеннан "Дуслык белән көчле без!" күңел ачу чарасы үтте.

Бүген бакчабызда "Федераль белем бирү программасына нигезләнеп тәрбия һәм белем бирүнең эчтәлеген яңарту" темасы астында балалар бакчалары мөдирләре һәм өлкән тәрбиячеләренең район методик берләшмә утырышы үтте. Җитәкче-педагоглар 2кечкенәләр төркемендә Галимарданова Г.Р., уртанчыларда Лотфуллина Л.Г., зурларда Гыйльфанова З.Р., мәктәпкә әзерлек төркемендә Сабирова Р.Р. үткәргән эшчәнлекләр аша ФББП кергәннән соң булган үзгәрешләрне анализладылар. Тәрбия һәм белем бирүдә уку елы башыннан булган үзгәрешләрне, яңалыкларны өйрәнделәр.