6 ноябрь – Татарстан Җөмһүриятенең Конституциясе көне. Моннан 22 ел элек, 1992 нче елның 6нчы ноябрендә, Татарстанның Дәүләт Шурасы республикабызның төп канунын кабул иткән иде. 6 нчы ноябрь – милләтебез өчен олы һәм һаман да әле мөһимлеген югалтмаган көн буларак билгеләп үтелә. Барлык милләттәшләребезне әлеге истәлекле көн белән котлыйбыз!
 

4 ноябрь-Халыклар бердәмлеге көне. Безнең халыкта бик мәртәбәле бер әйтем бар: бердәмлектә – көч. Әйе, бердәм булсак, бер-беребезгә авыр чакта ярдәм кулы сузсак, җәмгыятебездәге вакыйгаларга битарафлык күрсәтмәсәк, төрле дин, милләт халкына, аларның гореф-гадәтләренә хөрмәт белән карасак, шул чагында без – көчле халык. Иң әһәмиятлесе – кыйблабыз ачык, туры булсын.

Бүгеннән укучыларыбыз көзге каникулга китте.  Һәр  сыйныфта "Көзге каникуллар чорында үз – үзеңне тоту кагыйдәләре” дигән темага тәрбия сәгатьләре үткәрелде. Укучыларга сулыклар тирәсендә, янгын һәм электр куркынычсызлыгы, гадәттән тыш хәлләр вакытында үз-үзеңне тоту, негатив ситуацияләр вакытында, урамда, җәмәгать урыннарында үз –үзеңне тоту буенча, кич йөрүләр, караңгы төшкәч яктылык кайтаргычлар куллану турында сөйләшүләр үтте. Күңелле һәм файдалы яллар сезгә!

Бүген без дәресләрдән соң т көзге уңыш бәйрәмен үткәрергә булдык .Мәктәбебез укучылары төрле конкурсларда ярыштылар. Алар арасында : "Кем җитезрәк?", "Көзге букет" ,"Көзге мода" , концерт номеры һ.б. конкурслар бар иде. Конкурслар тәмамлангач укучылар үзләре әзерләгән тәм-томнар белән  сыйландылар. 

“Татарча диктант” – татар телендә хатасыз язарга өйрәтү, әдәби татар телен кулланучылар даирәсен арттыру, орфографик һәм грамматик хаталарны тикшерү мәсьәләләренә игътибарны арттыручы белем бирү акциясе.

Мәктәп бакчасында эшләр төгәлләнеп килә. Бүген кәбестә уңышын җыеп алдык.

Бүген укучыларга һөнәри юнәлеш бирү максатыннан Казан кооператив институты вәкилләре булып китте. Алар үзләренең уку йорты белән таныштыдылар, керү имтиханнары турында сөйләделәр.

Киләсе ел өчен кайгыртып,чәчәкләрдән орлыклар җыеп алдык,чәчәклекләрне чүпләрдән арындырып,язга чаклы чистартып калдырдык.

5 нче октябрь көнне илебездә укытучылар үзләренең профессиональ бәйрәмнәрен - Укытучылар көнен билгеләп үтәләр. Чын күңелебездән Кошман укытучылар коллективын әлеге матур бәйрәм белән тәбрик итәбез! Эшегездә һәм тормышыгызда зурдан-зур уңышлар, ныклы сәламәтлек, сабырлык, күңел тынычлыгы, гаилә бәхете теләп калабыз! Укытучы – дөньяны танып – белергә омтылучы, балаларның керсез пакь күңелләренә гыйлем орлыклары чәчүче һәм аларның тигез матур шытымнар бирүен сабыр гына көтүче Остаз, газизләрдән – газиз әниләр белән берүк дәрәҗәгә куярлык изге зат. Шулай ук балаларның нечкә саф күңеленә саклык белән генә кагылучы, аларга хаклык энҗеләрен тезүче оста киңәшче психолог та, уку барышында юл күрсәтүче маяк та, алай гына түгел, укытучы ул – ил- көндә барган һәр яңарыш, һәр борылыш, һәр үзгәрешне үз аңы аша үткәреп, алгарыш мәйданында җинү яулашкан каһарман шәхес тә!
Укытучы!

Синдәдер ул йөрәкләрнең иң олысы,

Синдәдер ул йөрәкләрнең иң җылысы,

Һәркөн сиңа ничә сабый карап тора,

Алар сине әниседәй якын күрә.

Еласалар, син аларны юатасың,

Боексалар, син аларны уйнатасың,

Сөйләшәсең күңелләрен аңлап кына,

Орышасың кайчагында җайлап кына.

Үз улыңдай, үз кызыңдай якын күреп,

Укытасың ничә буын балаларын.

Киткән чакта мәктәп белән саубуллашып.

Елый-елый озатасың син аларны.

Укытучы!

Кирәк чакта җитез дә син, тапкыр да син,

Кирәк чакта сабыр да син, батыр да син,

Бик җаваплы, авыр синең хезмәтең дә,

Тиешенчә күрсәң иде хөрмәтен дә.