Бүген Лесхоз бистәсе мәдәният йортында үткәрелгән район башлыгының чыршы бәйрәмендә мәктәбебезнең уку алдынгылары, спортта яхшы нәтиҗәләргә ирешкән, төрле конкурсларда катнашып, җиңү яулаган укучыларыбыз катнашты. Алар бәйрәмнән күтәренке кәеф, шатлыклы хисләр белән кайттылар. Әлеге бәйрәмне оештыручыларга мәктәбебез коллективыннан һәм әти-әниләр исеменнән зур рәхмәтебезне җиткерәбез.

4,5,6нчы гыйнвар көннәрендә мәктәбебездә Бөтенроссия укучылар олимпиадасының республика этабында  катнашачак укучылар һәм 9,11нче сыйныф укучылары белән ОГЭ, ЕГЭга әзерлек эшләре үткәрелде.

    Бүген, 5нче гыйнвар көнне Эзмә урта мәктәбе  Олыяз мәдәният йорты белән берлектә балалар өчен  Яңа ел лотереясы үткәрде. Әлеге уенда кече яшьтәге мәктәп укучылары да, балалар бакчасына йөрүче нәниләребез дә катнашты. Бу мероприятие  барлык балаларга да кызыклы һәм күңелле булды. Балаларның һәммәсе дә үзләре отып алган призлардан канәгать калды.

Бүген лагерьның соңгы көне. Укучылар белән саф һавада булып кергәннән соң, чыршы янында бәйрәм үткәрелде. Ә төшке аштан соң лагерь белән саубуллашу оештырылды. 

Бүген  балалар өчен физкультура укытучысы Шайхлисламов Б.Ф. "Быстрее.Выше.Сильнее" уены  оештырды. Шулай ук укучыларыбыз "Остров Дружбы и Доброты" дип аталган мероприятиедә дә бик актив катнаштылар. 

Көннең беренче яртысында укучылар белән "Брейн-ринг" уены үткәрелде. Уенның беренче бүлегендә рус теле укытучысы Гарифуллина Г.Р. укучыларның хәтерен, игътибарын үстерү максатыннан уеннар уйнатты, ә  икенче бүлектә вожатыйлар тарафыннан әлеге уен  төрле тематикага багышлап үткәрелде. Мавыктыргыч уеннан соң, балалар саф һавада чаңгыда шудылар, төрле уеннар уйнадылар. Төшке аш ашагач, әкиятләр иленә сәяхәт оештырылды. Укучылар әкиятләр карадылар, викторинада катнаштылар. Көн күңелле узды.

Бүген 8,10нчы сыйныф укучылары һөнәр сайлау юнәлеше буенча "Саба таңнары" газетасы редакциясендә кунакта булдылар. Укучылар газета эшчәнлеге һәм редакциянең бай тарихлы  муззее белән таныштылар.Экскурсиянең дәвамы Лесхозда "Нарат" боз сараенда дәвам итте. Сәяхәт Урман музее белән тәмамланды.

Бүген лагерьның 4нче көне бик кызыклы, файдалы  узды. Иртәнге аштан соң лагерьга йөрүче балалар район үзәгенә экскурсиягә бардылар. Туган якны өйрәнү музеенда, китапханәдә булдылар. Шулай ук үзәк чыршы янында күңел ачтылар, кар сыннары карадылар, чанада шудылар. Балаларга әлеге экскурсия бик ошады. Ә төшке аштан соң химия укытучысы Арстамбекова Г.З. балаларга молекула модельләре төзергә өйрәтте, кызыклы тәҗрибәләр күрсәтте. Шулай ук бию түгәрәге оештырылды.

Лагерьга йөрүче укучыларыбыз иртәнге аштан соң хореография түгәрәгендә шөгыльләнделәр. Аннан соң Иләбәр авыл китапханәсенә экскурсия оештырылды. Ә төшке аштан соң Эзмә мәдәният йортында күңел ачу программасында катнаштылар. Көн бик күңелле һәм файдалы узды.

Бүген лагерьның икенче көне. Иртәнге аштан соң лагерь ачылышына багышланган "Йолдызлар фабрикасы" булды. Шулай ук күңелле биюләр дә балалар күңеленә хуш килде. Ә төшке аштан соң әкиятләр иленә сәяхәт оештырылды.