Мәктәп яны тәҗрибә участогында җәй буе тырышып хезмәт куюның нәтиҗәсен күрү бик күңелле. Бу көннәрдә бакчабыздан  мул итеп суган уңышы җыеп алынды.

Җәйге каникул дәвамында мәктәп яны тәҗрибә участогында эш гөрләп тора. Укучылар график нигезендә  практика узалар: түтәлләрдәге чүп үләннәрен утыйлар, су сибәләр.

Җәйге чорда 14-18 яшьлек 17 яшүсмер "Саба" җәмгыятенә һәм "Галиахметов И.Х." фермер хуҗалыгына эшкә урнашты. Бүгенге көндә 10 укучы  "Саба" җәмгыяте ындыр табагында, фермада хезмәт куялар.

Мәктәп коллективы "Чиста яр" акциясендә бик теләп катнашты.  Күмәк көч белән чишмә һәм инеш буйлары чистартылды, үләннәр чабылды. Тирә-юнебез чиста булса, үзебезгә дә күңелле!

13 июль көнне 8 класс укучысы Сөнгатуллина Айгөл  Сәләт-Биләр форумында катнашты. Сәләтле яшьләр өчен оештырылган әлеге форумда укучылар яңа технологияләр, алдынгы тәҗрибә белән таныштылар.

 "Дуслык" лагеренда 21 көн сизелми дә үтеп китте. Көн саен нинди дә булса төрле яңалыклар, кызыклы әңгәмәләр, күңелле сәяхәтләр белән лагернең соңгы көне җиткәнен сизми дә калдык. Бүген бик күңелле итеп "Сабантуй" бәйрәме булып үтте. "Чүлмәк вату", "Канат тарту", "Галош киеп йөгерү", "Су ташу" кебек кызыклы уеннарда катнашып, бик күп бүләкләр оттык. Иң соңыннан лагерь турында үзебезнең кичерешләр белән уртаклаштык.

"Дуслык" лагеренда 20 нче көнебез "Хәтер көне"нә багышланган флешмоб белән башланып китте. Иртәнге аштан соң отрядларда "Сезнең батырлык - мәңгелек" темасына әңгәмә үтте. Олы Кибәче авыл территориясендә урнашкан һәйкәлләргә веноклар куелды. Отрядлар арасында "Сугыш чоры җырлары" дип исемләнгән бәйге узды. "Күңелле старт" спорт интеллектуаль уены белән көнебез тәмамланды.

"Дуслык" лагеренда 19 нчы көнебез гадәттәгечә иртәнге линейкадан башланып китте. Иртәнге аштан соң "Чәчәкләр тормыш яме" дип исемләнгән бәйрәм булып үтте. Соңыннан балалар "Ташлар иле"нә сәяхәт кылдылар. Төшке аштан соң "Матурлык янәшәдә" дигән темага асфальтта рәсем ясадылар.

"Дуслык" лагеренда экология атналыгы дәвам итә. Бүген балалар Зөлхиҗҗә чишмәләре тирәсен чистарттылар. Авылыбызның иң матур һәм изге урыннарының берсе булган чишмәбез авылдашларыбызга  саф суы, матурлыгы белән көч өстәп, сөендереп торсын!

"Дуслык"та 16 нчы көн "Урман көне" буларак үтте. Иртәнге аштан соң балалар мәктәп тирә - ягындагы агачлар белән таныштылар, табигатьтә экскурсиядә булдылар. "Урман - зур байлык" дип исемләнгән экологик КВН да катнашып, үзләренең көчләрен сынадылар.