Мәктәбебез шугалагы яңа кышка әзер! Тимераяк белән дус булган һәркемне, хоккей сөючеләрне мәктәп шугалагында көтәбез.

Сездә бармы шугалак?

Вәт бездә шәп шугалак!

Тимераяклар кыздырып,

Әйдә, шуыйк бергәләп!

Шугалакны ясау өчен армый-талмый, кичен һәм көндез  көч куйган физик тәрбия укытучысы Әсләм Закирҗан улы Кәбировка мәктәп җитәкчелеге, әти-әниләр комитеты һәм шугалакта үз сәламәтлеген арттырачак һәркем исеменнән зур рәхмәтебезне җиткерәбез. 

Мәктәбебездә дәресләргә кадәр Билгесез солдат көненә багышланган мәгълүмати иртә узды. Тарих укытучысы Рәхимова Т.А. әлеге датаның килеп чыгу тарихы һәм әһәмияте турында мавыктыргыч итеп сөйләде, компьютер презентациясе аның сөйләмен тагын да тәэсирлерәк итте. Күңелләрдәге дулкынлану хисе күзләргә яшь булып эленде. Әлеге иртә  илебезгә тынычлык яулап һәлак булган, бүгенге көндә дә каберләре билгесез солдатларны 1 минутлык тынлык белән искә алып , ил-көннәребезгә тынычлык теләп тәмамланды.

1 нче ноябрьдән игълан ителгән Хокук бозуларны кисәтү айлыгы ахырына якынлаша. Ай дәвамында сыйныфларда тематик сыйныф сәгатьләре, анкеталаштырулар, иҗади  язма эшләргә конкурслар, вазифаи заталар белән очрашулар узды. Бигрәк тә, 8-9 нчы сыйныф укучылары үзләренең активлыклары белән аерылып тора. Бүген исә алар "Мин һәм закон" дип аталган презентацияләр конкурсына әзерләнә, репетицияләр ясый.

Бүген мәктәбебездә Әниләр көненә багышланган бәйрәм концерты булды. Концерт "Алмаш" балалар оешмасы эзтабарлары һәм варислары катнашында үткәрелде. Дәртле биюләр, нәфис сүз, җырлар, кулдан ясалган истәлекле бүләкләр- барысы да иң кадерлеләребез өчен! Алай гына түгел, эзтабарларыбыз, әниләре килүгә , тематик рәсемнәр күргәзмәсе оештырса, варисларыбыз "Әнием- бердәнберем" дип аталган иҗади язмалардан күргәзмә оештырды.

Әниләребез бәйрәмне бик ошаттылар: һәркем үз нарасыен бүген мәктәп сәхнәсенең зур артисты итеп күрә алды бит!

Мәктәбебез бүген шатлыклы вакыйгалардан гөр килә. Бүген- бик җаваплы көн, чөнки "Укытучы-остаз"лар  Ганиева И.И. һәм Колмөхәммәтова З.Э. җитәкчелегендәге төркемнәр үз проектларын тамашачылар каршында яклады. Эзтабарларыбыз , экологик проект башкарып, авылыбыз чисталыгын тәэмин итү юлларын тәкъдим итте. Варисларыбыз исә, Кизләү авылының авыл туризмы проекты кысаларында туробъект булырга хаклы булуын дәлилләп, килгән кунакларны, мәктәп укучыларын экскурсион маршрутлар белән таныштырды.

"Шатлык" балалар отряды  авылыбызның Мәктәп урамы 2а йорты каршындагы мәйданчыкта "Сәламәт ана-сәламәт бала" шигаре астында чираттагы акцияләрен уздырды. Урамнан узучы бер хатын-кыз да чәчәксез һәм үз адресына комплиментсыз калмады. Аларга  сәламәт яшәү рәвеше алып баруы белән һәркемгә үрнәк булуы өчен рәхмәт сүзләре әйтелде,  Бу чара Хокук бозуларны кисәтү айлыгы кысаларында  тагын да әһәмиятлерәк тоелды. Катнашучы һәркем киләчәк буынның сәламәтлеге аларның сәламәт яшәү рәвеше алып барулары белән турыдан-туры бәйле булуына төшенде.

Чыгарылыш сыйныф укучыларыбыз рус теленнән ДЙА форматында сынауларын уңышлы тапшырган. Афәрин! Без Сезнең өчен бик шат! Укуларыгызның нәтиҗәсе һәрвакыт уңай булсын! Рус теле һәм әдәбияты укытучысы Хәбибуллина Ф.И. ата-аналар исеменнән эчкерсез рәхмәтебезне җиткерәбез.