Китапханәчебез Мортазина Г.Р. җитәкчелегендә бүген "Алмаш" балалар оешмасы эзтабарлары Кошлар көненә багышланган эшлекле иртә оештырдылар. Кошларның табигать, кешеләр тормышы өчен әһәмияте, әдәби иҗатта кош образлары турында эчтәлекле сөйләшүдән соң, оригами ысулы белән кошлар ясалып, символик ояга һәм агачка беркетелделәр. Шулай ук китапханәдә "Безнең вернисаж" исеме астында кош рәсемнәре күргәзмәсе дә эшли башлады. Канатлы дусларыбыз турындагы рәсемнәрегезне көтеп калабыз, ә инде әдәбиятта һәм әйләнә-тирәбездә кошлар турында мәгълүматларны тематик күргәзмә материалларыннан табарга мөмкин.

Сурәттә тематик күргәзмәдән күренеш.

7 нче сыйныф укучылары биология укытучысы Халитов В.М., технология укытучысы Курамшин Р.Х. җитәкчелегендә кошлар турында кызыклы викторина уздырды. Иртәнге чарадан соң, алар әзерләгән сыерчык оялары мәктәп ишегалдындагы каен агачларына беркетелде. Елдан -ел арта барган ояларда сыерчыклар укучыларны шатлыклы сайраулары белән иртән каршы алалар, ә инде дәресләрдән соң сайрап озаталар. 

Ә Сез быел сыерчык оялары ясадыгызмы?

Сурәттә: сыерчык оялары өлкәннәр ярдәме белән мәктәп ишегалдындагы каен агачларына эленде.

"Алмаш" ТВБ балалар оешмасы рәисе, мәктәбебез укучысы Колмөхәммәтов З.И. "ТАТМЕДИА" АҖ  тарафыннан уздырылган  "Иң яхшы шигырь"  бәйгесендә IIII дәрәҗәдәге дипломга лаек булды.Афәрин! Котлыйбыз, җиңүчегә киләчәктә дә иҗади уңышлар телибез.

Бүген Нурлат аграр техникумында уздырылган ачык ишекләр көнендә (һөнәри сынап карау) безнең мәктәпнең  9 нчы сыйныф кызлары да  катнашты. Алар "Җәмәгать туклануы продукциясе технологиясе" мәйданчыгында "Пешекче" , "Технологг " белгечлеге буенча һөнәрне тәкъдир итү, пешекче хезмәтендә язма документлар һәм технологик карта ярдәмендә ризык пешереп карау этапларында үзләрен кызыксындырган һөнәр турында күп яңалыклар белделәр. Махсус дисципланалар укытучысы Фәйзуллина Миләүшә Якуб кызы җитәкчелегендә бәрәңге зразылары пешереп карадылар.

Гомумән алганда, бүген оештырылган чара анда катнашучы һәркемне һөнәр сайлауга бик җаваплы карарга кирәк икәненә төшендерде. Мәктәптә алынган фәнни белемнәр җыелмасының, кем генә булырга теләсәң дә,  нык булуы мөһим икәнен ассызыклады.

Һөнәр сайлау- язмыш сайлау икәнне исегездән чыгармагыз!

Сурәттә Фәйзуллин М.Я. пешекче булырга теләүчеләр белән кухняда.

Бүген мәктәбебездә   "Балалар китабы" атналыгын ачу иртәсе оештырылды (китапханәче Мортазина Г.Р.). Китапны кадерләп тоту,  әсәр геройларын тану алардан үрнәк яки гыйбрәт алу, укылган китап буенча фикер алышу турында Шапшак һәм Китапның (иртә геройлары) бәхәсе бик кызыклы оештырылган иде.

Әлеге чара балалар китабын таныту ягыннан бик әһәмиятле булды.

Әйт, авылым, кайда соң моң?

Моң кайда соң, әйт, урам?- сорауларына җавап өлкән буынны гына түгел, ә бүгенге яшүсмерләрне дә борчый. Шуңа җавап йөзеннән, бүген мәктәбебездә гармуннар тарихы һәм гармун турындагы җырларга багышланган "Безнең гармун моңлы да ул, безнең гармун җырлы да" исемле җыр конкурсы (телевезион "Җырлыйк әле" программасы үрнәгендә) уздырылды. Ярышта 7-8 нче сыйныф укучылары көч сынашты. Нәтиҗәдә,  гармун  уйнаучы егетләр, моңлы тавышлы җырчы кызларыбыз катнашындагы бу тамаша бик күңелле һәм файдалы булды. Уен этаплары арасында тамашачыларга гармун тарихы, Татарстанның атаклы гармунчылары турында мәгълүматлар җиткерелде.

Программаны җыр дәресләрен укытучы Курамшин Р.Х. , татар теле һәм әдәбияты укытучысы Колмөхәммәтова З.Э. оештырды.

Бүген мәктәбебез кунагы- Киекле җирле үзидарә башлыгы, Киекле Башкарма комитеты җитәкчесе Рәфис Габбас улы Ганиев катнашында Парламент дәресе узды. Дәрестә "Дуслык" район газетасы хәбәрчесе дә катнашты.

"Рождественские чтения"  - XIV республикакүләм укучыларның фәнни-эзләнү конференциясенең сайлап алу туры тәмам. Мәктәбебездән З.Колмөхәммәтовның эше әлеге турны уңышлы узды, укучыбыз бүген конференциянең 2 нче турына чакыру алды. 

Егетләребез бүген үз көчләрен Киекле авылында уздырылган  алкалы хоккей буенча район ярышларында сынады. Призлы урынга лаек булмасалар да,  команданың әзерлеге турында мактау сүзләре генә ишеттек. Уенчыларыбыз ярыштан матур тәэсирләр белән кайтты. "Иң яхшы капкачы", "Иң шәп һөҗүмче"  номинацияләрендә җиңүгә исә  безнең мәктәп командасыннан   М.Мортазин һәм Ф.Ганиев  лаек дип табылган Афәрин! Без сезнең белән горурланабыз, егетләр.

Районкүләм  спорт ярышын уздыруга күп көч куйган Киекле урта гомуми белем мәктәбе җитәкчелегенә һәм физик тәрбия укытучысы Рәфис Рәис улы Гыймалетдиновка, командабыз тренеры Әсләм Закирҗан улы Кәбировка, яшүсмерләр спорт мәктәбе тренеры Глүс Нәфыйк улы Җәләлетдиновка, мәктәбебезнең алдагы елгы чыгарылыш укучылары  Риназ Әхмәтов һәм Илмир Рәхимовка мәктәп җитәкчелеге һәм ата-аналар комитеты исеменнән зур рәхмәтебезне җиткерәбез. 

Бу ярыш- алдагы зур җиңүләр алдыннан реванш алу булсын!

Мәктәп шугалагында бүген үзләренең улларына каршы әтиләр хоккей уйнады. Уен ахырында исәп әтиләр файдасына булды. Афәрин! Сезгә карап бүгенге егетләр, мәктәп укучылары сокланды, хөрмәтле әтиләр! Сез булдырасыз, уллары белән  хоккей уйнарлык әтиләребез булу белән без бик горурланабыз. Уенны оештырган Әтиләр Советына зур рәхмәтебезне белдерәбез.