ГТО нормаларын тапшыру һәркемгә кирәк! Мәктәбебездәге укучылар бу гыйбәрәне бик яхшы аңлый. Шуңа да хәзерлек эшләре, нормалар тапшыру атна дәвамында туктамый.

Рус теле һәм әдәбияты атналыгы кысаларында бүген М.М.Пришвинның “Кладовая солнца” әсәре буенча “Кем миллионер булырга тели?” интеллектуаль уены узды. Уенда 6 нчы сыйныф укучысы Сәгъдиева Ләйсән җиңеп чыкты.

Бүген  “ЭКО” мәктәптән тыш эшләр үзәгендә өстәмә белем бирү педагогларының район конкурсы булды. Конкурста безнең мәктәптә эшләүче “Көмеш каләм” түгәрәге җитәкчесе Сайранова Р.Т. катнашты, уңышлы чыгыш ясап 2 нче урынны алды һәм зона турында катнашу хокукын яулады. Чыннан да, бу түгәрәк мәктәбебезнең өстәмә белем бирү системасында аерым урын алып  тора. Һәр ай саен “Көмеш каләм” газетасы чыга. Укучыларның иҗат җимешләре “Кайбыч таңнары” газетасында еш дөнья күрә, “Сабантуй” журналында басыла. Болар барысы да - түгәрәк җитәкчесенең тырыш хезмәте нәтиҗәсе. Чүпрәледә узачак зона турында да коллегабызга зур уңышлар телибез.

Рус теле һәм рус әдәбияты атналыгы дәвам итә. Бүген  рус теле укытучысы Садриева Р.З. 5 нче һәм 6 нчы сыйныф укучылары арасында “Әкият иленә сәяхәт” дип аталган турнир уздырды. Күп төрле, кызыклы биремнәрне үтәгәннән соң,  нәтиҗәдә ике команданың  очколары тигез булып чыкты. Димәк, дуслык җиңде.

Ә  7, 8. 9 нчы сыйныфлар арасында рус теле буенча “Кем миллионер булырга тели?” уен-конкурсы бик мавыктыргыч булды. Җиңүчеләр-7 нче сыйныф укучылары.

30 январьда Олы Кайбыч урта мәктәбендә “Сыйныф җитәкчесе-2015” конкурсының зона-муниципаль  туры булды. Бу конкурста безнең мәктәпнең данын 5 нче сыйныф җитәкчесе Насретдинова А.Ә. яклады һәм 3 нче урынны алды.   Конкурсантлар үз-үзләрен презентацияләделәр, төрле стандарт булмаган педагогик ситуацияләрне чиштеләр, сыйныфтан тыш чара күрсәттеләр. Алия Әүхадулла кызы  конкурска Ленинград блокадасына багышланган тәрбия сәгате тәкъдим итте. Бу дәрес тетрәндергеч,  бик күңелгә үтеп керә торган булды  һәм Алия Әүхадулла кызының  үз эшенең остасы булуын, белемгә, яңалыкка омтылучан, рухи яктан бай педагог икәнлеген күрсәтте.  

"Адрес мой -Кайбицкий край" башлангыч сыйныф укучылары арасында үткәрелгән төрле эшләнмәләр  конкурсында безнең мәктәп укучылары уңышлы катнашып, төрле номинацияләрдә призлы урыннар алдылар. "Художественное вязание" номинациясендә Шәмсетдиннова Камилә (4 кл) - 1 нче урын (җитәкче Кадырова А.С.), "Художественная вышивка" номинациясендә Хикмәтуллина Кадрия (4 кл)-2 нче урын (җитәкче Багавиева Э.Р.), "Росьпись по дереву" номинациясендә Сабиров Сәйдәш (4 кл)-2 нче урын, Насретдинов Алмаз (3 кл)-3 нче урын (җитәкче Насретдинов А.Л.), "Макет" номинациясендә Кул эшләре" түгәрәге -1 нче урын (җитәкче Хәмидуллина М.С.). Әфарин!

28 январьда мәктәптә рус теле һәм рус әдәбияты атналыгы башланды. Атналык планында төрле конкурслар, күргәзмәләр һәм башка чаралар каралган. Атналык М.Ю.Лермонтовның әсәрлерәнә иллюстрацияләр конкурсы белән башланып китте. Ул бөек рус шагыйренең  200 еллыгына багышланган.

27 нче январьда мәктәбебез укучылары график буенча “Кайбыч” боз шугалагына бардылар. Һәм рәхәтләнеп тимераякта шудылар.  Бер сәгать тимераякта шуу 400 калорийны яндырырыга ярдәм итә. Моннан тыш бозда шуу вакытында башка бернинди шартларда да “эшләми” торган аяк мускуллары ныгый. Даими рәвештә тимераякта шуу матдәләр алмашынуын яхшырта, нерв системасын ныгыта. Ниһаять, бер сәгатькә боз өстенә чыгып керү көндәлек мәшәкатьләрдән арынып, рәхәтләнеп ял итү мөминлеген бирә. Кыскасы, физик яктан да рухи яктан да сәламәтләнәсегез килсә – шугалакка рәхим итегез!  

Мәктәптә ГТО нормаларының кышкы этабы буенча норамалар тапшыру башланды. Укучылар январь аенда турникта тартылу, гәүдәне кулга таянып күтәрү (отжимание) һәм аркада яткан килеш гәүдә күтәрү (поднимание туловища) буенча үзләрен сыный башладылар.

21 нче январьда без, 6 сыйныф укучылары, сыйныф җитәкчебез Гөлшаһидә апа  һәм мәктәптә эшләүче   Диләрә апа белән Казан Федераль Университетының планетариясенә экскурсиягә бардык. Планетарийга беренче тапкыр барганга күрә,  ничек буласын күз алдына китерә алмаган идек. Баксаң,  шактый кызыклы урын булып чыкты ул. Башта планетарийдагы кызыклы экспонатлар буенча экскурсия булды. Аннары безне  “Звёздное шоу”  үзенең могҗизалары белән шаккаттырды. Соңыннан исә “Чёрные дыры” фильмын карап галәм турында күп мәгълүматлар белдек. Планетарийга экскурсия безгә да,  өлкәннәргә дә   бик ошады. Экскурсияне оештырырга ярдәм иткән РОО начальнигы Шакиров И.А.ка,  мәктәп директоры Хәмидуллин И.И.ка,  шофёр Фиргать абыйга бик зур рәхмәт.

6 нчы сыйныф укучылары