"Психологик десант" эшчәнлеге нигезендә бүген безнең мәктәпкә районның психологик хезмәтеннән педагог-психолог  һәм логопед килделәр. Алар 9 нчы сыйныф укучылары белән һөнәри юнәлеш бирү максатыннан диагностик тест биремнәрен башкардылар һәм "Стресска каршы торучанлык" темасына тренинг үткәрделәр. Шулай ук, логопед Алевтина Александровна 1 нче сыйныф укучылары белән сөйләмдәге кыенлыкларны ачыклау максатыннан әңгәмә үткәрде.

Бүген башлангыч сыйныф укытучысы Вилданова Д.Р. 3 нче сыйныфта рус теле фәненнән ачык дәрес күрсәтте. Дәрестә башлангыч сыйныф укытучылары, биология фәне укытучысы, уку-укыту буенча директор урынбасары катнаштылар. Дәреснең максаты укучылар белән "Сүз ясалышы" һәм "Тамырдаш сүзләр" темаларын ныгыту иде. Дәрес бик нәтиҗәле үтте.

Бүген Чүти урта мәктәбендә сыйныф җитәкчеләре һәм тшрбия эше буенча директор урынбасарларының районкүләм семинары үтте. Семинар "Укучыларга һөнәри юнәлеш бирүдә килеп туган мәсьәләләр" темасына багышланган иде. Семинар өч өлештән торды: "Һөнәрле үлмәс, һөнәрсез көн күрмәс" һәм "Эш сөйгәнне ил сөя" исемле сыйныф сәгатьләре, 9-11 сыйныфлар өчен "Юллар чатында" дип аталган чара, билгеләнгән тема буенча докладлар белән чыгышлар. Семинарга төрле һөнәр вәкилләре белән беррәттән Кайбыч районы башлыгы - Рахматуллин А.И. та чакырылган иде.

Укучыларыбыз Кошман авылында яшәүче, ярдәмгә мохтаҗ булган әби-бабайларга көчләреннән килгәнчә булышып торалар: өйләренә барып, хәлләрен белешәләр, хуҗалык тирәсендә ярдәмлек күрсәтәләр. Кайчакта җылы күз карашы, ягымлы сүз дә өлкән буын кешеләренең күңелен күтәрә, шуны онытмасак иде. Бер-беребезгә, олыларга карата мәрхәмәтле, игътибарлы булсак иде!

Кичә, 3 нче декабрь көнне "Салават күпере" ССКнда мәктәп укучылары арасында шахмат буенча ярышлар үткәрелде. Безнең укучылар: Ахметшина А., Сабиров С., Саттаров А. да әлеге ярышларда катнашып кайттылар.

"Россиядә хәрби дан һәм истәлекле көннәр" Федераль законы нигезендә илебездә 3 нче декабрьдә Билгесез Солдатны искә алу Көне билгеләп үтелә. Шул уңайдан бүген Россиянең хәрби-тарихи җәмгыяте Бөтенроссия акциясе үткәрелде. Безнең мәктәптә дә әлеге темага әңгәмәләр оештырылды һәм укучылар Кошман авылында урнашкан мемориалга чәчәкләр куйдылар. Илебез тынычлыгы өчен сугышта катнашкан, яу кырында ятып калган солдатларны без һәрчак истә тотарга бурычлы!

1 нче декабрь - Халыкара СПИДка каршы көрәш көне. Ул 1988 нче елдан бирле билгеләп үтелә. Әлеге чир ел саен меңләгән кешенең гомерен алып китә. Шуңа күрә СПИД һәм ВИЧ эпидемиясе хакында күбрәк мәгълүмат булдыру, аны булдырмау һәм алдан ук саклану чараларын белеп тору максатыннан мәктәпләрдә "Стоп ВИЧ/СПИД" Бөтенроссия акцияләре уздырылды. Бу чарадан безнең мәктәп тә читтә калмады. Сыйныф сәгатендә эпидемиянең килеп чыгуы, аларның нәрсә аңлатуы, саклану чаралары турында һәм "Халыкара СПИДка каршы көрәш көне"нең символына әверелгән кызыл тасма хакында сөйләнелде.

28-29 ноябрь көннәрендә Мордовия Республикасының Саранск шәһәрендә "Россия Федерациясенең субъектларында татар мәгърифәте көннәре" үтте.  Әлеге чарада Татарстан Республикасының фән һәм мәгариф министрлыгы делегациясе составында безнең мәктәбебез директоры Хәмидуллин И.И. та катнашты. Алар 19 нчы номерлы гимназиядә эшләп килүче Республиканың мәктәпара милли мәдәнияте үзәгендә укытучыларның мастер-классларын карадылар. Шулай ук алар сәләтле балалар лицеенда, Кривозерск мәктәбендә, Лямбир балалар бакчасында  булдылар. Очрашу вакытында Кошман мәктәбе белән Мордовия Республикасы МБУ "Саранск шәһәренең 19 номерлы гимназиясе" һәм "Лямбир районы Пензят урта мәктәбе" арасында Килешү төзелде. Бу Килешүнең максаты: белем бирү һәм тәрбия эшендә үзара тәҗрибә уртаклашу, укытучылар һәм укучылар арасында рухи, иҗади бәйләнешне үстерү.

Мәктәбебез тирәли утырткан агачларыбыз матур булып үсеп киләләр. Аларны кышкы салкыннардан саклау максатыннан укучылар "Табигатьне бергә саклыйк!" акциясендә катнаштылар. Киләсе язларда әлеге агачлар безне һичшиксез яшь бөреләре белән сөендерер.

Әни, әнием, әнкәй! Кадерләп, назлап әйтәбез. Күңелебездәге бөтен рәхмәтне шушы гади сүзгә салабыз, һәрвакыт яныбызда булган, уңышларыбыз өчен шатланып, кайгыларыбызны уртаклашып яшәгән газиз әниебезгә дәшәбез...

27 нче ноябрь көнне илебездә "Әниләр көне" билгеләп үтеләчәк. Шул уңайдан бүген мәктәптә әлеге матур бәйрәмгә багышланган "Әнкәй - җирдә иң зур кеше!" исеме астында кичә үткәрелде. Бәйрәм тамашасында укучылар үз көчләре белән әзерләгән концерт номерларын башкардылар, әниләренә истәлекле "күчтәнәчләр" - үз куллары белән ясаган бүләкләрен тапшырдылар. Шулай ук кичәдә әниләр белән төрле кызыклы уеннар оештырылды. Бәйрәм күтәренке рухта барды, әнкәйләрнең йөзләрендә шат елмаюлар әлеге кичәне тагын да ямьләндерде. Кадерле Әниләребезне барыбыз да якынлашып килүче "Әниләр көне" белән тәбрик итәбез! Сезгә ныклы сәламәтлек, иминлек, озын гомер телибез, һәрвакыт шат, сөйкемле, бәхетле булыгыз!