Безнең мәктәбебездә бүген кунакта Кошман авылында яшәүче Насретдинова Л. кунакта булды. Лилиянең мәктәпкә килүе беренче тапкыр гына түгел, шуңа күрә укучылар һәм укытучылар аны бик якын итәләр, үзенә дә өенә кунакка килгәлиләр. Әлеге мөлаем кыз барлык кешегә дә бик ачык, шунлыктан башкалар да аңа тартылып тора. Бүген ул 5 нче сыйныф кызлары белән хезмәт дәресен укыды. Дәрестә балалар төсле битләрдән аппликацияләр ясадылар. Лилиягә бездә бик ошады. Без аны мәктәбебездә тагын көтеп калабыз.

Бүген мәктәбебез укучылары педагог-оештыручы Кадырова А.С. җитәкчелегендә Фёдоровск авылындагы Картлар йортында үз көчләре белән әзерләнгән концерт тамашасын күрсәтеп кайттылар. Укучылар шигырьләр сөйләделәр, рус һәм татар телләрендә җырлар башкардылар, үзләренең матур биюләрен бүләк иттеләр. Өлкәннәргә әлеге тамаша бик ошады, алар чын күңелләреннән "Рәхмәт" сүзләрен җиткерделәр һәм киләчәктә тагын да яңа очрашуларга чакырып калдылар.

Бүген мәктәптә һәрвакыттагыча иртәнге линейка уздырылды. Линейка барышында узган атнада дежур торган сыйныфның отчеты тыңланылды һәм мәктәп күләмендә үткәрелеп килүче бәйге-конкурсларга йомгак ясалды, иң актив дип табылган укучыларга грамота һәм дипломнар тапшырылды.

9 нчы декабрь - Халыкара  коррупциягә каршы көрәш көне. Шул уңайдан кичә Казан шәһәренең IT - паркында әлеге темага карата түгәрәк өстәл утырышы булып узды. Утырыш  "2016-2017 нче елда коррупциягә каршы Милли планны тормышка ашыру чаралары" темасы астында үтте, анда бүгенгесе көндә бу өлкәгә кагылышлы булган кискен мәсьәләләр күтәрелде. Утырышта делегат буларак безнең мәктәп директоры Хәмидуллин И.И. та катнашты. " Коррупциягә каршы көрәш" темасы Кошман мәктәбендә укучылар арасында да киң яктыртыла, әлеге юнәлештә төрле профилактик чаралар: сыйныф сәгатьләре, рәсем һәм инша конкурслары, әңгәмәләр үткәрелә.

Бүген мәктәбебезнең 9 нчы сыйныф укучылары гражданлык-патриотик һәм рухи тәрбия буенча буенча оештырылган онлайн-мониторингта катнаштылар.

9 декабрь –  Россиянең истәлекле көннәре календаренда мөһим дата – һәр шәһәрдә, һәр авылда төрле елларда Ватанны саклап сугышларда каһарманлык, батырлык һәм кыюлык күрсәткән сугышчыларны искә алалар. Мондый бәйрәм өчен 9 декабрь очраклы гына сайланмаган. Екатерина II нәкъ менә бу көнне 1769 елда яңа бүләкне раслый. Ул Изге Георгий ордены була. Аның белән аерым батырлык күрсәткән сугышчылар бүләкләнгән. Илебездә бу көнне Георгий ордены кавалерларын хөрмәтлиләр. Россиядә бу көнне чын батырларны искә алып, алар турында хәтер яңарталар. Шул уңайдан безнең мәктәптә әлеге истәлекле датага багышланган сыйныф сәгатьләре үткәрелде. Шулай ук укучылар Бөек Ватан сугышы ветераны - Зиганшин Хәсән абый һәм Әфган сугышында катнашкан авылдашларыбыз белән дә очраштылар.

Бүген Чаллы дәүләт педагогик университетында республикакүләм ата-аналар җыелышы уздырылды. Әлеге җыелыш сәгать 17.00 дә интернет челтәре аша онлайн режимда үтте. Җыелыш "Ата-ана - остаз" темасы астында уздырылды. Әлеге чарада безнең мәктәп укытучылары һәм ата-аналар да катнашты.

Бүген Татарстанның халык шагыйре Шәүкәт Галиев хөрмәтенә туган авылы - Апас районы Бакырчы авылындагы мәктәптә "Шәвәли оныклары" исеме астында төбәкара иҗат бәйгесе үтте. Безнең мәктәптән бу конкурста "Көмеш каләм" түгәрәге җитәкчесе Сайранова Р.Т. белән берлектә ике укучы: Минвалиева И. һәм Гиниятуллина К. катнаштылар. Уңышларыбыз да бар: Минвалиева И. 2 нче урынга лаек дип табылды! Котлыйбыз!

8 нче декабрь көнне Кайбыч районының "Салават күпере" спорт һәм сәламәтләндерү коплексында укучыларны Россиякүдәм яшьләрнең хәрби-патритотик "Юнармия" хәрәкәтенә кабул итү тантанасы булып узды. Әлеге тантанада безнең мәктәп укучылары да таашачы булып бардылар. Тантана тәмамланганнан соң укучылар Ватан Геройлары көне уңаеннан Әфган сугышында катнашкан якташларыбыз истәлегенә куелган һәйкәлләргә венок куйдылар.