4 сыйныф укучылары Гарипова Зөһрә инглиз теленнән, Галләмов Алмаз рус теленнән Балтач районы Мәгариф идарәсенең яхшы нәтиҗәләргә ирешкән өчен рәхмәт хатына  ия булдылар. Рус теленнән олимпиадага  әзерләүче -   Гайфуллина Э.Г., инглиз теленнән - Аухадиев И Ф.

Тәрҗемә һәм иҗат эше белән шөгыльләнүчеләр дә телләр атналыгында бүләкләнделәр. 1 урынга 8 нче сыйныфтан Хәйруллин Әмир, 6 нчы сыйныфтан Гарипова Гөлсөя лаек булды. Гомумән, 6 нчы сыйныфлар  - бу чарада иң актив катнашучылар.

26 апрель көнне 9 сыйныф укучылары агач утырту акциясендә катнаштылар. Урманчы Марат Хәкимов бүләк итеп биргән агачлар мәктәп тирәсенә һәм чишмә буена утыртылды. "Мәктәпкә бездән истәлек булып калсыннар, еллар узгач безне очрашуларга чакырып торсыннар", -дип аңлаттылар 9 лар үзләренең изге эшләрен. 

Пионерия заманыннан калган традициягә туры китереп, 22 апрель көнне мәктәп территориясен җыештыру өчен өмә оештырылды. Анда барлык укучылар һәм укытучылар тырышып эшләделәр.

Бөек шагыйребез Габдулла Тукайның туган көне алдыннан һәм "Туган тел" атналыгы кысаларында тәрбия сәгатьләрендә укучылар оешмасы тарафыннан Тукай турында чыгышлар ясалды. Аның турында балачактан алып өйрәнсәк тә, ул һаман да белгән саен күбрәк беләсе, ишетәсе килә торган шәхес. 

Башлангыч сыйныф укучылары белән  китапка багышлап оештырылган чара  бик күңелле  һәм җанлы узды.

"Балалар китабы" атналыгы кысаларында 1 нче сыйныф укучылары китапханәдә кунакта булдылар. Очрашуны китапханәче Шәйхиева Г.С. үткәрде.

Кинәт кенә килеп чыга торган очракларда кеше югалып кала. Шуңа күрә аны мондый күренешләргә күнектерергә кирәк. Боларны исәпкә алып ОБЖ  укытучысы Гадил Гаптрафикович бүген укучыларның эвакуация вакытында үзләрен ничек тотуларын, кагыйдәләрне үтәүләрен тикшерде.

"Карактан кала, уттан юк", дип халык белеп әйтә. Авыр хәлләргә юлыкмас өчен, һәрвакыт саклану чараларын күрергә кирәк. Бүген мәктәбебездә булган уттан саклау хезмәткәрләре дә укучыларга бу турыда аңлатты. 

Сыйныфларда Космонавтика көненә карата тәрбия сәгатьләре үткәрелде. Башлангыч сыйныфларны  укучылар оешмасыннан Хасанова Әдилә космос тарихына багышланган эчтәлекле материал белән таныштырды.