Халыкара балалар ышаныч телефоны көне 17 нче май көнне билгеләп үтелә. Ышаныч телефоны буенча бала аноним рәвештә квалификацияләнгән психологик ярдәм алачак. Шулай ук бу номер буенча гаиләдә һәм аннан тыш физик көч куллану очраклары буенча да ярдәм сорарга мөмкин. Россия күләм ышаныч телефоны 8-800-2000-122 (гади телефоннан да, кесә телефоныннан да шалтырату бушлай).

Бүген мәктәбебез укучылары һәм укытучылары, мәктәп территориясен тәртипкә китерү буенча, өмәдә катнаштылар.

15 май - Гаилә көне. Гаилә - татулыгы белән көчле, ди халкыбыз.Күшәр төп белем бирү мәктәбендә үткән әңгәмә дә нәкъ менә шул темага булды.

Бүген, мәктәбебезнең 9 нчы сыйныф укучылары татар теленнән Бердәм Республика Тесты тапшыралар. Уңышлар сезгә!

11 май көнне мәктәп укучылары Бөек Ватан сугышы ветераны, бүгенге көндә Түбән Шашы авылында матур гына гомер кичерүче, Галиев Фәйзи ага белән очраштылар. Фәйзи ага балаларга фронт вакыйгалары һәм сугыш чорында авылдагы тормыш турында сөйләде һәм үзенең “Безнең көннәр” дип исемләнгән китабын бүләк итеп калдырды.

9 май – Бөек Җиңүнең 70 еллык юбилее. Әлеге Бөек дата Әтнәдә зур тантана буларак билгеләп үтелде. Бәйрәмнең иң дулкынландыргыч өлеше, мөгаен, стройда хәрбиләрчә атлап үтүче укучылар булгандыр. Алар арасында безнең мәктәпнең дә 16 укучысы бар иде.

8 май көнне мәктәбебездә Бөек Җиңүнең 70 еллыгы уңаеннан тантаналы митинг үткәрелде. Митингта тыл батырлары, сугыш чоры балалары катнашты. “Үлемсез полк” акциясендә катнашып,  укучылар сугышта үлеп калган бабаларының, тыл батыры булган әбиләренең  фотоларын кулларына күтәреп чыктылар.

  Бөек Җиңүнең 70 еллыгы уңаеннан Күшәр мәктәбендә тыл батырлары, сугыш чоры балалары өчен Күшәр күмәк хуҗалыгы тарафыннан чәй өстәле әзерләнде, мәктәп укучылары кунакларга бәйрәм концерты күрсәттеләр. 

Бүген, 30 нчы апрель көнне, Күшәр төп белем бирү мәктәбендә, яшь белгечләр өчен «Мультимедиа технологияләрен куллану аша укучыларның танып-белү эшчәнлеген үстерү» дигән темага район семинары булып узды. Укытучылар игътибарына, яшь белгечебез - Мухаметгалиева Эльвира Наил кызы, 8 нче сыйныфта информатика фәненнән  " РАЗРАБОТКА И СОЗДАНИЕ КОМПЬЮТЕРНОЙ ПРЕЗЕНТАЦИИ С ИСПОЛЬЗОВАНИЕМ МУЛЬТИМЕДИА ТЕХНОЛОГИЙ " темасына ачык дәрес үткәрде. Соңыннан, түгәрәк өстәл артында, бу дәрескә анализ ясалып уңай бәяләнде.

Бүген мәктәбебездә Бөек Җиңүнең 70 еллыгына «Үлемсез полк» дип аталган почмак оештырылды.