15 нче февраль – интернационалист сугышчыларны искә алу көне. Әфган сугышы күп югалтулар китерә. Саннар уйланырга мәҗбүр итә... Халкыбызга кайткан 15 меңгә якын кургаш табут, 36 мең яралы, 312 хәбәрсез югалган солдат язмышы һәркемне борчый. Шушы дата уңаеннан әфганчы якташларыбыз искә алынды, һәлак булган авылдышларыбыз хөрмәтенә венок салынды.

Бүген мәктәбебездән 8 укучы Арчаның 7 нче номерлы мәктәбендә уздырылган "Аҗаган" уенының зона ярышларында катнаштылар.Укучылар үзләрен күп яктан сынадылар: вакытка противогаз киделәр, миналар эзләделәр, граната ыргыттылар, яралыны бер урыннан икенче урынга күчерделәр, каршылыклар аша үттеләр, сорауларга җаваплар бирделәр. Команда составында түбәндәге укучылар катнашты һәм уңышлы чыгыш ясады: Нурисламов Р.-6 кл., Закирҗанов И.-6 кл., Сәләхов И.-7 кл., Хөснетдинов Р.-7 кл., Мингазова З.-7 кл., Гафуров А.-8 кл., Галимуллина И.-8 кл., Хөснетдинов Р.-8 кл. Аларны әлеге ярышка Сөнгатов Ш.Җ. һәм Мингазов М.В. әзерләде.

Хәрби-патриотик айлык барышында мәктәпнең "Туган якны өйрәнү музее" нда укучылар еш була. 4 нче класс укучылары экскурсия вакытында борынгы эш коралларын,  табылдыкларны, медальләрне,  сувенирларны җентекләп күзәттеләр,  үзләренә бик күп мәгълүмат тупладылар.

Укучылар технология дәресләрендә техник иҗат эше белән дә шөгыльләнәләр. 4 нче класс укучылары практикага кайткан Бикбаев Рафис Рәшит улы җитәкчелегендә кәгазьдән самолет моделе ясарга өйрәнделәр, аларны очыртып та карадылар.

Патриотик айлык барышында батырлык турында әңгәмәләр циклы эшли. 6 нчы класста укучылар "Кем ул патриот?" төшенчәсенә җаваплар эзләделәр, туган илне ярату хисен шигырьләр аша белдерделәр.

"Коррупциягә каршы көрәш юнәлешендәге республикакүләм "Намуслы яшәргә кирәк"( Надо жить честно") конкурсының район этабында иҗади эшләре белән мәктәбебез укучылары да катнашты. 9 нчы класс укучысы Мөхәмәдиева Хания (укытучы - Юнысова Р.К.) татар телендәге язмасы белән 2 дәрәҗә диплом белән бүләкләнде. Аны җиңүе белән котлыйбыз!

Бөек Җиңүнең 70 еллыгы уңаеннан классларда әңгәмәләр, класс сәгатьләре үткәрү дәвам итә.  

Узган ял көннәрендә Арча шәһәре стадионында "Россия чаңгы юлы-2015" чарасы үтте. Анда мәктәбебез укытучылыры һәм укучылар актив катнашты. Нәтиҗәләр буенча 6 нчы класс укучысы Мингазова Илүзә 3 нче урынны, физик тәрбия укытучылары Мингазов М.В. һәм Хәбибуллин Ф.М. икесе дә 2 нче урынны яуладылар. Аларны җиңүләре белән котлыйбыз!!!

Бүген Арчаның сәнгать мәктәбендә "Йолдызлык-Созвездие-2015" фестиваленең сайлап алу туры үткәрелде. Анда 7 нче класс укучысы Низамиева Таңсылу катнашты һәм уңышлы чыгыш ясады.

30 нчы гыйнвардан 1 нче февральгә кадәр 9 нчы класс укучылары Сәләхова Ф. һәм Мөхәммәдиев И. Арча районы җыелма командасы составында Яшел Үзән шәһәрендә узган чаңгы ярышында катнаштылар. Әлеге ярышта команда 2 нче урынга лаек булды. Җиңүчеләрне котлыйбыз!