Ел саен 1 декабрь көнне СПИД ка каршы Бөтендөнья көрәш көне билгеләп үтелә. Ул планета төбәкләре буенча таралуын дәвам итүче ВИЧ-инфекциягә каршы көрәшне ныгытуга хезмәт итә. Эпидемия башыннан 30 ел эчендә СПИД 25 миллионнан артык гомерне алып киткән, 60 миллионнан артык кеше ВИЧ белән йогышланган, 16 миллион бала ата-анасыз калган. Әлегә кадәр бу вирусны көн саен 7 меңнән артык кеше йоктыра. Бөтендөнья СПИД ка каршы көрәш көненә багышланган чаралар кысаларында бүген укучылар белән әңгәмә уздырылды, видеоролик каралды.

Изге гаммәлләр, әдәплелек, әхлаклылык - көн кадагына сугучы темалар. Кече яшьтәге балаларны әдәпле, әхлаклы булырга, изге гамәлләр кылырга өйрәтү – безнең бурычыбыз. Шушы максаттан чыгып, 3 нче сыйныфта “Изге гаммәлләр кылыйк!” темасына класс сәгате үткәрелде. Класс сәгатендә шул ачыкланды: укучылар изге гамәлләрне күп эшлиләр һәм тагын да эшләргә теләкләре зур. Ахырдан изге гамәл кылдылар: классташлары Камлне туган көне белән котладылар һәм җыр җырладылар.

Әхлаклы бул, әдәпле бул:

Яратыр олы, кече.

Дөньяда иң әйбәт кеше

Яхшылык кылган кеше.

Бүген 7 нче класс укучылары "Әни - иң кадерле исем" дигән кичә уздырдылар. Укучылар әниләренә багышлап иң матур теләкләрен җиткерделәр, җырлар җырладылар. 

Бүген Арча Укучылар сараенда баскетбол буенча ярышлар үтте. Анда безнең мәктәпнең кызлар командасы (тренеры - Мингазов М.В.) катнашты һәм алар 3 нче урынны яуладылар. Кызлар командасын җиңүләре белән котлыйбыз!

Бүген 4, 6, 8 нче класс укучылары инглиз теленнән диагностик тест үттеләр.

Ризаэддин Фәхреддиннең әхлак дәресләренә нигезләнгән тәрбия минутларын укучылар һәрчак көтеп ала. Бүген 5 нче класс укучылары белән түгәрәк өстәл артында гаилә, әти-әнине хөрмәтләү темасына җанлы сөйләшү үтте.

Бүген Урта Курса мәдәният йортында зонадагы 5 мәктәп катнашында "Парклар елы" на багышланган КВН  булып узды. Һәр мәктәп командасы, шул исәптән безнең мәктәпнең "Җәннәт бакчасы" командасы да уенга җитди әзерләнгән иде. Командаларга чыгышлары өчен рәхмәт белдерәбез.

Бүген 1 нче һәм 2 нче сыйныф укучылары белән толерантлык темасына әңгәмә үткәрелде һәм "Без төрле,ләкин без бергә!"дигән темага презентация каралды.

Террорчылык. Нинди куркыныч, тетрәндергеч сүз. Ул кешедә курку хисе уята, чөнки сугыш, бәла-каза, гаепсез кешеләрнең үлеме белән бәйле. Террорчылыкның кайчан һәм кайда булуын беркем әйтә алмый. 2004 елның 1 сентябрендә Беслан шәһәрендә булган вакыйгалар һәр кешенең күңелендә мәңгегә уелып калыр. Шушы вакыйгаларга бәйле рәвештә терроризм һәм экстремизмны кисәтү максатыннан мәктәбебездәдә әлеге теманы яктырткан дәресләр, сыйныф сәгатьләре, яшьләр акцияләре, түгәрәк өстәлләр, диспутлар, уеннар үткәрелә. Мәктәбенең 3 нче сыйныф укучыларын да “Террорчылык – җәмгыятькә янау” үткән сыйныф сәгате битараф калдырмады. Халык фаҗигасе, кеше кайгысы укучылар йөрәгенә барып җитте, күңеленә үтеп керде.  “Без тынычлык телибез!”- дип тәмамланды класс сәгате.