Бүген Яңа Кенәр урта мәктәбендә «Арча хәбәрләре» газетасы призына шахмат турниры узды. Бәйгедә ун команда катнашты, хәтта Әтнә һәм Балтач мәктәпләреннән дә укучылар бар иде. Тренер Лотфуллин М.Л. җитәкчелегендә безнең мәктәп укучылары да әлеге ярышта катнашты һәм сынатмады. Команда составында Шәфигуллин Камил, Хәмзин Ришат,Солтанова Камилә, Гыйлметдинов Таһир уйнады. Укучыларга алдагы ярышларда зур җиңүләр телибез.

Мәктәп һәм авыл мәдәният йорты бер-берсе белән тыгыз элемтәдә яши. Төрле ярыш, бәйгеләрне бергәләп оештыруда мәктәп директоры, авыл җирлеге рәисе, хуҗалык җитәкчесенең дә роле зур. Мәктәп спортзалында авыл яшьләре белән берлектә яисә алар өчен төрле спорт ярышлары уздырыла. 7 нче гыйнварда алты авыл яшьләреннән торган 7 команда арасында волейбол ярышы уздырылды. Волейбол- җитезлекне,төгәллекне,тиз җавап бирә белүне таләп итә торган спорт уены. Ярышларга җирлек рәисе Вафина Р.Р.,  хуҗалык җитәкчесе Гыйләҗетдинов Р.Г., Арча районының волейбол федерациясе җитәкчесе Рафаэль Муллагалиев та килгән иде. Алар спортчыларга зур уңышлар теләде. Командалар составында мәктәп укучылары да уйнады, чөнки алар да әлеге спорт төрен ярата, үз итә. Ярышлар кичкә кадәр барды һәм Югары Курса авылы яшьләре командасының җиңүе белән төгәлләнде. Һәр командага волейбол спортын тагын да үстерү өчен туплар тапшырылды.

Волейбол буенча кызлар командасы атнага ике тапкыр Гарифуллин Г.В. җитәкчелегендә волейбол түгәрәгендә шөгыльләнәләр. Каникул көннәрендә дә алар районда булачак ярышларга әзерләнәләр.

Бүген 9 нчы класс укучылары рус теле фәненнән сынау имтиханы биреп карадылар. Нәтиҗәләр канәгатьләнерлек булыр дип ышанып калабыз.

Бүген Түбән Мәтәскә урта мәктәбендә профсоюз хезмәткәрләре арасында зонаара шашка-шахмат ярышлары уздырылды. Әлеге ярышта мәктәбебездән Шәфигуллин Н.Ф һәм Шаһниева Р.Р. катнашты һәм уңышлы чыгыш ясады. Хатын-кызлар арасында шахмат буенча 2 нче урынны Шаһниева Р.Р. яулады. Афәрин!

Укучылар каникулда да вакытларын бушка уздырмыйлар, яратып чана, чаңгы шуалар.

Хөрмәтле хезмәттәшләр! Сезне Яңа ел белән котлыйбыз! Киләсе елда бәйрәмнәрегез мөбарәк, күңелле, куанычлы булсын.Эшләрегез уң булсын, күңелегездәге мәрхәмәтлелек нуры йөзегезне тагын да бизәсен. Бусагаларыгыздан караңгылык, салкынлык, хәвеф-хәтәр атлап кермәсен, бәла-каза йөрмәсен. 2016 нчы ел бәхетле мизгелләр, матур вакыйгалар, яхшы хәбәрләр, саулык-сәламәтлек алып килсен.

Бүген 2 нче чирек нәтиҗәләре буенча педагогик киңәшмә үткәрелде. Көн тәртибендә яртыеллык йомгаклары, программа үтәлеше каралды. Төп белем бирү ФДС да каралган тәрбия принципларын тормышка ашыру буенча чыгыш һәм фикерләр тыңланды, дәүләт йомгаклау аттестациясенә әзерлекнең барышы белән фән укытучылары таныштырды. Киңәшмәдә алдагы чиреккә бурычлар куелды.