23 февраль - Ватанны саклаучылар көне. Шушы уңайдан әтиләребезгә нәни кулларыбыз белән бәйрәм открыткалары ясадык. Әтиләребез һәрвакытта кыю, батыр, көчле, намуслы булсыннар. Без аларны яратабыз.

Әлеге уңайдан бакча да төрле чаралар узды. Безгә кичәләр дә, бәйрәмнәр дә, башка чаралар да катнашырга Сикертән мәдәният йорты һәм Гөберчәк авыл китапханәсе хезмәткәрләре дә еш киләләр. Ә менә бу бәйрәмгә безнең балалар үзләре Гөберчәк авыл китапханәсенә кунакка бардылар. Китапханәче Зарипова Гөлфирә Зөфәр кызы "Үз ана телем - минем өчен матур, иң матур тел!" дигән тема астында балаларга әдәби-музыкаль кичә оештырган иде. Балалар ана телендә аралаштылар, китаплар белән таныштылар, түгәрәк уеннар уйнадылар, бишек җырлары тыңладылар. Бик файдалы, кызыклы кичә оештырганы өчен Рамия Бахрам кызына, Гөлфирә Зөфәр кызына зур рәхмәт.

15 нче февраль - герой шагыйрь Муса Җәлилнең туган көне. Әлеге вакыйга уңаеннан безнең балалар бакчасында да әдәби-музыкаль кичә булып узды. Тәрбияче Гөлүсә Сөнгатулла кызы белән Гөберчәк авылы китапханәчесе Гөлфирә Зөфәр кызы балаларга кызыклы чара әзерләделәр. Балалар Муса Җәлилнең тормыш юлын исләренә төшерделәр, шигырьләр тыңладылар, үзләре дә сөйләделәр, җырлар җырладылар, кызыклы сорауларга җаваплар эзләделәр, шагыйрьнең китаплары белән таныштылар.

Яз җитүгә, балалар, тәрбияче ярдәмендә, суган белән тәҗрибә үткәрәләр. Бер өлеш суганны балчыкка, икенче өлешен суга утырталар. Көндә күзәтеп, нәтиҗә ясыйлар. Мондый тәҗрибәләрне балалар бик яратып, кызыксынып эшлиләр, күзәтәләр.

Статистика буенча җәяүлеләрне таптату – юл-транспорт вакыйгаларының иң киң таралган төре. Таптатуларның төп өлеше тәүлекнең караңгы вакытына туры килә, чөнки бу вакытта автомобиль йөртүче транспорт юлына чыккан кешеләрне күрерлек хәлдә түгел. Моңа уңайсыз һава шартлары – яңгыр, җепшек кар, томан һәм җәяүлеләрнең өс киемендә яктылык кайтаргыч элементлар юклыгы да сәбәп булырга мөмкин. Статистика бәхәсләшергә урын калдырмаган мәгълүмат бирә – яктылык кайтаргыч элементны файдалану җәяүлене таптату куркынычын 65 процентка киметә. Яктылык кайтаргыч элементлар (фликерлар) – ул махсус материаллардан ясалган, яктылык нурын яңадан аның чыганагына кайтарырга сәләтле, автомобиль фарлары яктыртылышында ачык-ак төскә әверелә торган элементлар. Яктылык кайтаргыч элементларны, брелокларны, беләзекләрне транспорт юлыннан 80 сантиметрдан алып 1 метрга кадәр өстә урнаштыру мәҗбүри. Аларны урнаштыру өчен иң кулай урыннар – күкрәк һәм ботлар. Җәяүледә шундый элементларның берничә булуы – оптималь вариант. 140 сантиметр озынлыктагы баланың фликерларын рюкзагына, җиңенең өске өлешенә, баш киеменә урнаштыру зарур. Әгәр кеше велосипедта хәрәкәт итә, үзе янында бала арбасы яки чана бар икән, әлеге транспорт чараларына да фликерлар урнаштыру зарур. Яктылык кайтаргыч элементларны кешеләргә генә түгел, йорт хайваннарының муенчакларына һәм япмаларына да урнаштырырга кирәк. Хөрмәтле әти-әниләр! Балагыз юлда яктырып күренсен өчен хәстәрен күрегез. Баланың киемендә яктылык кайтаргыч элементлар булырга тиеш. Исегездә тотыгыз – кара, соры киемдә кечкенә җәяүле транспорт йөртүчегә бөтенләй күренми, димәк аны таптату куркынычы бар. Үзебезнең тарафтан безнең балалар бакчасы да бу чарадан читтә калмады.  Яктырткыч чараларны барладык, булмаганнарга куйдык, әңгәмәләр үткәрдек. Төп максат балаларга, уеннар аша юл йөрү кагыйдәләрен ныгыту һәм яктылык кайтаргыч элементлар турында булган белемнәрен тирәнәйтеп, яңаларын бирергә һәм тормышта шушы алган белемнәрен кулланып үзләренең һәм якыннарының тормышын саклап калырга өйрәтү иде.