Бүген бакчабызда Гөберчәк авыл китапханәсе белән берлектә "Батырлар даны мәңгелек" исеме астында, Бөек Җиңүнең 74 еллыгы уңаеннан, әдәби чара булды. Китапханәче Гөлфирә Зөфәр кызы балаларга сугыш, анда катнашкан кешеләр, батырлыклары турында, ниләр эшләүләре турында сөйләде. Сугышта катнашкан әби-бабай, туганнарны барладылар. Сугышта катнашкан шагыйрь, язучылар белән таныштырды. Китапларын карадылар, шигырьләрен укыдылар.

Шигырь әгәр йөрәгең

Табалмасаң урын җаныңа.

Яктырыр барыр җирең

Шигырь булса һәрчак яныңда.

27 апрель көнне Гөберчәк авыл китапханәчесе Зарипова Гөлфирә Зөфәр кызы Гөберчәк авыл халкын, Сикертән мәктәбе укучыларын, Сикертән балалар бакчасында тәрбияләнүче балаларны күп кырлы шәхес, үзе әйткәнчә “хыялый” шагыйрә Гөлчирә Нәҗметдинова белән очраштырды. Балалар шагыйрәнең шаян шигырьләрен сөйләделәр, җырлар җырладылар, биеделәр, китаплары белән таныштылар. Мондый чара оештырып, безне кунакка чакырганы өчен Гөлфирә Зөфәр кызына зур рәхмәтебезне белдерәбез.

Габдулла Тукайның тууына 133 елга багышланган,  районда узган "Сандугачтай моңлы Тукай теле" конкурсында Шәймәрданов Илсаф чыгыш ясап 3 урынга лаек булды.

"Китапка икенче гомер бүләк ит!" исеме астында узган акция тәмам. Катнашкан балаларга, ата-аналарга зур рәхмәт! Бакча фондына барлыгы 30 китап өстәлде.

Бу атна бакчабызда "Космонавтика атналыгы" шаулап-гөрләп узды. Тәрбияче тәрбия чараларында гына түгел, һәр шөгыльне космос белән бәйләп алып барды. Булсын ул рәсем шөгыле, булсын ул туган тел - һәр кайсында йолдызлар, ракета, планета, Белка, Стрелка, Юрий Гагарин, Кояш, Галәм, Җиһан төшенчәләре еш кулланылды. Балаларда да бу төшенчәләр хәрәкәтле уеннар, мультфильмнар, фильмнар, презентацияләр, логик уеннар аша тизрәк исләрендә калды. Математика шөгылендә алар "Космонавт булам" уенын тиз отып алдылар. Йолдызларны буяп, санап, саннар буенча тоташтырып, ракета ясадылар. 

Бүген бакчада Г.Камал исемендәге Сикертән төп белем мәктәбе укытучысы Шәмсемөхәмәтова Гөлназ Фирдүс кызы "Син Җиһан һәм Галәмне беләсеңме?" исеме астында балаларга кызыклы, эчтәлекле чара үткәрде. Балаларга бик күңелле булды, кызыксындырган сорауларын биреп кенә тордылар. 

Бүген балалар "Космос"ка сәяхәт кылдылар. Анда алар Җиребез, башка планеталар, беренче космонавтлар турында белделәр. Балаларның космостагы тормыш турында сораулары, кызыксынулары бик ошады.