Балаларны юл йөрү кагыйдәләренә өйрәтү- өлкәннәрнең, әти-әниләрнең, укытучыларның һәм шулай ук ЮХИДИ хезмәткәрләренең төп бурычларының берсе булып тора. Бүген, 28 нче гыйнвар көнне, Д. Г. Хәкимов исемендәге Түбән Мәтәскә урта мәктәбендә 3-4 класс укучылары өчен "Юлда булсаң - имин бул!" дип исемләнгән чара уздырылды. Бу чараның төп максаты - балаларга юлларда хәвеф-хәтәрсез йөрү, светофор төсләренә карап ничек дөрес хәрәкәт итүләрен ачыклау, игътибарлыкны арттыру, юл кагыйдәләренә буйсынырга өйрәтү иде. Әлеге чарага Арча шәһәреннән ЮХИДИ хезмәткәре Энже Газизовна да килгән иде. Ул үз чиратында, юлларда йөргәндә күңелсезлекләр килеп чыкмасын өчен саклык инструктажы үткәрде һәм балаларның сорауларына җавап бирде. Әңгәмә ахырында балаларга юл йөрү кагыйдәләре җыентыгын һәм яктылык кайтаручы элементын тапшырды. Алга таба да ГИБДД инспекторы белән аралашып, күрешеп тору безнең укучыларыбыз өчен бик файдалы булыр дип ышанып калабыз!

27 гыйнварда без Ленинград блокадасы өзелү көнен искә алабыз. Ленинград шәһәренең ике ел ярым чолганышта яшәве - Бөек Ватан сугышы тарихындагы иң аянычлы көннәр. 5, 7 классларда класс җитәкчеләре Закирова Л.Ә., Шакирова Г.К. истәлекле көн турында класс сәгате үткәрделәр. Ленинградны саклаучылар, "тормыш юлы", "блокада икмәге" турында искә төшерделәр.

Укучыларда өлкән буын кешеләренә карата миһербанлылык, хөрмәт, ихтирам, шәфкатьлелек, мәрхәмәтлелек хисләре тәрбияләү максатыннан, озынайтылган көн төркемендә тәрбияләнүче укучылар озак еллар мәктәптә техник хезмәткәр булып эшләп, лаеклы ялга чыккан, олы яшьтәге Зәйнәп апаның өендә булып, хәлен белеп кайттылар.

Мәктәптә "Ел укытучысы-2021" бәйгесенең зона этабы үтте. Ташкичү, Кенәр, Кушлавыч, Казанбаш мәктәпләреннән килгән конкурсантлар дәрес һәм мастер-класс күрсәтте.

Туган телләр һәм халыклар бердәмлеге елы уңаеннан бүген Шакирова Г.К. 7 нче сыйныф укучылары белән “Туган телем – татар теле” дигән темага сыйныф сәгате үткәрде. Алар күп гасырлык тарихы булган , Каюм Насыйрилар , Тукайлар нигез салган , 7 миллион халык сөйләшкән , дөньядагы иң дәрәҗәле 14 тел исәбенә кергән ,чит илләрдә дә өйрәнелә торган , бүгенге көндә камилләшкән, теләсә нинди катлаулы фәнне өйрәтергә мөмкинлеге булган туган телебез – татар теле турында сөйләштеләр.