15 май - Халыкара гаилә көне уңаеннан барлык классларда да класс сәгатьләре үтте. Укучылар үзләренең гаиләләре турында сөйләделәр, укытучы сөйләгәннәрдән дә күп мәгълүмат алдылар.

Укучылар мәктәп яны тәҗрибә участогында бик тырышып эшлиләр. Алар түтәлләр ясадылар, яшелчәләр, карлыган, чия агачлары  утырттылар.

Арча шәһәре стадионында җиңел атлетика ярышлары булып узды. Безнең мәктәп командасы район буенча 8 нче урынны алды.

Татарстанның атказанган артисты Гүзәл Маликова улы Гайсә Маликов белән мәктәбебездә концерт күрсәттеләр. Аларның чыгышлары укытучыларга һәм укучыларга бик ошады.

Мәктәптә футбол уеннары башланып китте. 7 чне классларга каршы 5,6 нчы класслар һәм укытучылардан торган командалар уйнады. Икенче команда 7-2 исәбе белән җиңү яулады.

Бүген авылыбыз уртасында урнашкан "Батырларга мәңгелек дан!" һәйкәле янында Җиңү бәйрәме булды. Бәйрәмгә сугыш һәм тыл ветераннары чакырылды. Ветераннарны Кәче авылы ветераннар берлеге рәисе Солтанов Рәсим Солтанович, Арча шәһәре ветераннар берлеге рәисе Җамалиев Альберт Миңнегулович, Кәче авыл җирлеге башлыгы Закиров Тәлгать Дәүлиевич, Кәче төп гомумбелем мәктәбе директоры Муллахмәтов Нияз Наилевич бәйрәм белән тәбрикләделәр. Шигырьләр, җырлар белән үрелеп барган театральләштерелгән күренеш һәркемнең күңеленә хуш килде. Без ветераннар алдында аларның батырлыкларына баш иябез.

Ветераннар, ветераннар,

Сезгә хөрмәт- ихтирамнар,

Сез булганга матур булып,

Алсу булып ата таңнар!

Мәктәбебездә Бөек Җиңүнең 70 еллыгын каршыларга әзерлек эшләре дәвам итә. Укучылар технология укытучысы Копылова Г. Г. белән бик матур веноклар, чәчәкләр ясадылар, концерт номерлары, сценарий әзерләнде. Ветераннарга чакыру кәгазьләре, котлау открыткалары җибәрелде.

Арча укучылар сарае үткәргән "70 еллыкка - 70 бишле" акциясе тәмамланды. Мәктәп буенча җиңүчеләр билгеләнде: 2-4 нче сыйныфлар арасында - Мамаева Алинә, 5-7 нче сыйныфлар арасында - Шакирова Алинә, 8-9 нчы сыйныфлар арасында - Садыкова Энҗе. Әлеге укучылар 9 нчы май көнне Арча шәһәрендә узачак Җиңү парадында катнашачаклар.

Арча шәһәре стадионында мәгариф оешмалары арасында җиңел атлетика буенча ярышлар узды. Анда безнең мәктәптән дә укытучылар катнашты. Физик тәрбия укытучысы Хәйдәр Зәйнуллин кырык яшьтән өлкәнрәкләр арасында 400 метрга йөгерүдә  1 нче урынны яулады. Аны җиңүе белән котлыйбыз!