Такталачык төп гомуми белем бирү мәктәбендә башлангыч класс укучыларының  дәрестән тыш эшчәнлеген дөрес һәм файдалы оештыруга зур игътибар бирелә. Чөнки гомуми белем бирүнең федераль дәүләт стандартларында   дәрестән тыш эшчәнлек мәҗбүри компонент булып тора.
 Бу эшчәнлек укучының танып белүен, иҗади активлыгын арттыра, уңай шәхси сыйфатлар тәрбияли.  Спорт - сәламәтләндерү юнәлеше буенча эшчәнлек бу көннәрдә саф һавада оештырыла.

“Бергәләп эшлик”  Экологик акция кысаларында  Такталачык төп гомуми белем бирү мәктәбе башлангыч  сыйныф укучылары  тирә якны чистарттылар, югары класс укучылары райондагы, Татарстандагы экология торышы турында сөйләштеләр.

 Яңа уку елының беренче атнасы сизелми дә үтеп китте. Атналык йомгак вакытында кайбер  укучыларга җәйге чорда ирешкән уңышлары өчен Мактау грамоталары, сертификатлар тапшырылды.      Укучылар өчен  кагыйдәләр искә төшерелде, алдагы атнага план кабул ителде. Тәртип һәм чисталык саклау өчен өлкән класс укучылары үз фикерләрен әйттеләр.

  Уңышларны барлар чак. Мәктәп бакчасында тамыразык алыр чак җитте. Бу  көннәрдә  хезмәткәрләребез балалар өчен иң файдалы  яшелчә - кишер алу белән шөгыльләнә. Аның  уңышы һәркемне шатландырырлык. Уңышның бер  өлеше кышын ашау өчен саклау  урынына  куелачак,  калганы "Сельский кооператив" ка тапшырылачак.

 Халкыбыз һөнәрләреннән - балан бүкәнләү, суган баулау кебек эшләр бүген онытылып бара.  Җимешләре бик ачы булса да , үзе гаҗәп файдалы бу җимешне,  5 нче класс укучылары җыеп,  класс җитәкчеләре А.М.Шәемова ярдәмендә бүкәнләп куйдылар.    Уңышның бу төре - район халкына көзге ярминкәләрдә тәкъдим ителәчәк.

 "Экстремизмга "Юк!" дибез !" айлыгы кысаларында 6-7 нче класста класс җитәкчесе Газетдинова А.А   дәрес- презентация үткәрде.

  Белгәнебезчә, узган уку елында Республика мәгариф министрлыгы тарафыннан укучыларыбызга дару үләннәре җыеп тапшыру эше тәкъдим ителгән иде. Тиздән дару үләннәре җыюның быелгы сезоны тәмамланачак. Бу көннәрдә укучыларыбыз кара миләш җыю белән шөгыльләнә.

 Сәламәт тәндә- сәламәт акыл       Күптән түгел ачылган яңа спорт мәйданчыгы укучыларыбызның  яраткан урынына әверелде .    Дөресләр бетеп, өйгә бирелгән эшләрне караштыруга, малайлар стадионга йөгерә.  Туп артыннан чаба- чаба, кич җиткәнне сизми дә кала  алар.  Никадәр шатлык, никадәр күңелле тәэсирләр!

 30 нчы август- Республика көнендә Такталачык авыл җирлегендә  тантаналы төстә яңа спорт мәйданчыгы ачылды.   Бу чарада район башкарма комитеты  җитәкчесенең социаль мәсьәләләр буенча  урынбасары Шамсунова Ландыш Җәүдәт кызы, администрация башлыгы урынбасары Бариев Илфак Шамил улы ,   авыл халкы, укучылар , СМИ вәкилләре, "Молодая гвардия" яшьләре , Актаныш  сәнгать мәктәбе укучылары катнашты.

 Беренче сентябрь иртәсендә кыңгырауның көмеш чыңы балаларны кабат мәктәпкә җыйды. Шул уңайдан мәктәптә Белем бәйрәме уздырылды. Быел 8 бала беренче класска укырга керде. Гомуми укучылар саны- 75 .  Тантанада мәктәп коллективы, ата- аналар,  мәгариф ветераннары,  җирле үзидарә башлыгы Шайхразыев К.М., коррекцион мәктәп директоры Хаҗиев А. С.,район "Теплосервис" оешмасы җитәкчесе  Нәгыймов Д.М. катнашты