Такталачык төп гомуми белем бирү мәктәбенең физика- информатика укытучысы Радик Гайсин,  2015 нче елның икенче яртыеллыгына газета-журналларга язылу буенча "ТАТМЕДИА" АҖ тарафыннан оештырылган  "Язылган өчен  jPad" дип исемләнгән республика конкурсында катнашып,  квитанциясен иң алдан җибәрүче  50 абунәче арасында  кызыксындыру бүләгенә ия булды.

 Такталачык мәктәп бакчасы укучыларның шат тавышлары белән гөрләп тора. Бәрәңге алу- укучыларның иң яраткан эше. Алар икенче икмәкне тиз арада  җыеп алып, саклауга куярга тырышалар. "Базың тулы булса,  кышың җылы узар", - дип халык белеп әйтә.

 Такталачык мәктәбеннән  Бөек Җиңүнең 70 еллыгы уңаеннан оештырылган укытучыларның җәйге спартакиадасында физкультура укытучысы   Исхаков Рузил Зөфәр улы гер күтәрү буенча 2нче урынга лаек булды,  директор Рахманов Алмаз Шамил улына кул көрәшендә  тиңнәр табылмады.  Ул -  спортның бу төрендә берничә ел рәттән җиңүче.  

  Такталачык мәктәбенең 8нче класс укучылары  Хабиров Д, Фаррахов И., Ханов Р, Нуриев Д, район үзәгендә оештырылган паспорт алу тантанасында катнаштылар. Егетләрне тормышларындагы истәлекле вакыйга уңаеннан тәбрик итәбез. Россиянең лаеклы гражданнары булуларын телибез.

 Такталачык төп гомуми белем бирү мәктәбендә башлангыч класс укучыларының  дәрестән тыш эшчәнлеген дөрес һәм файдалы оештыруга зур игътибар бирелә. Чөнки гомуми белем бирүнең федераль дәүләт стандартларында   дәрестән тыш эшчәнлек мәҗбүри компонент булып тора.
 Бу эшчәнлек укучының танып белүен, иҗади активлыгын арттыра, уңай шәхси сыйфатлар тәрбияли.  Спорт - сәламәтләндерү юнәлеше буенча эшчәнлек бу көннәрдә саф һавада оештырыла.

“Бергәләп эшлик”  Экологик акция кысаларында  Такталачык төп гомуми белем бирү мәктәбе башлангыч  сыйныф укучылары  тирә якны чистарттылар, югары класс укучылары райондагы, Татарстандагы экология торышы турында сөйләштеләр.

 Яңа уку елының беренче атнасы сизелми дә үтеп китте. Атналык йомгак вакытында кайбер  укучыларга җәйге чорда ирешкән уңышлары өчен Мактау грамоталары, сертификатлар тапшырылды.      Укучылар өчен  кагыйдәләр искә төшерелде, алдагы атнага план кабул ителде. Тәртип һәм чисталык саклау өчен өлкән класс укучылары үз фикерләрен әйттеләр.

  Уңышларны барлар чак. Мәктәп бакчасында тамыразык алыр чак җитте. Бу  көннәрдә  хезмәткәрләребез балалар өчен иң файдалы  яшелчә - кишер алу белән шөгыльләнә. Аның  уңышы һәркемне шатландырырлык. Уңышның бер  өлеше кышын ашау өчен саклау  урынына  куелачак,  калганы "Сельский кооператив" ка тапшырылачак.

 Халкыбыз һөнәрләреннән - балан бүкәнләү, суган баулау кебек эшләр бүген онытылып бара.  Җимешләре бик ачы булса да , үзе гаҗәп файдалы бу җимешне,  5 нче класс укучылары җыеп,  класс җитәкчеләре А.М.Шәемова ярдәмендә бүкәнләп куйдылар.    Уңышның бу төре - район халкына көзге ярминкәләрдә тәкъдим ителәчәк.

 "Экстремизмга "Юк!" дибез !" айлыгы кысаларында 6-7 нче класста класс җитәкчесе Газетдинова А.А   дәрес- презентация үткәрде.