Исламова Зөлфия Зәет кызы:

Бүген зурлар төркеме балалары белән бергәләп фонтан ясадык, тәҗрибә үткәрдек. Балалар бакчасы шартларында, кул астындагы материалларны кулланып фонтан ясап карагач, балалар үзләрен зур белгечләр итеп тойдылар. Барыбыз да әлеге тәҗрибәдә бик теләп катнаштык.  Бу тәҗрибә һәркем күңеленә дә хуш килде. "Өйгә кайтып якыннарыбызны да шаккатырабыз әле" диештеләр балалар.

Аглямова Миләүшә Васил кызы:

Бүген бездә "Пыяла көне" булып узды. Аның максаты булып пыяла турында булган белемнәрне ныгыту, пыялага хас булган билгеләрне әйтә белү, сүзлек запасын арттыру иде. Мәктәпкә әзерлек төркеме белән без пыялага рәсем ясарга өйрәндек, пыяла өстендә су тамчылары уйнаттык, төслэрне бер-берсе белән кушып тагын да матур төсләр китереп чыгардык

   Аглямова Миләүшә Васил кызы:

27 июль көнне мәктәпкә әзерлек төркеме балалары Актанышбаш авылы китапханәсенә экскурсиягә барды. Балаларны шат күңел белән китапханә хезмәткәре Хакимова Дилэрэ апа каршы алды. Экскурсия барышында балаларны уку залы һәм балалар абонементы эшчәнлеге белән таныштырды. Мәктәпкәчә яшьтәге балалар, китапларның мөһимлеге һәм аларның ясалу тарихы, алар белән сакчыл эш итәргә кирәклеге турында  да зур кызыксыну белән тыңлады. Шулай ук стеллажларга тезелгән төрле темадагы китапларны зур канәгатьлек белән карап чыктылар. Балаларда экскурсия чын мәгънәсендә зур тәэсир калдырды. Күбесе китапханәгә әти – әниләре белән килеп китап укучы буларак язылырга карар итте.  

Рус халык фольклоры бик бай һәм үзенчәлекле. Балалар кечкенәдән рус халык әкиятләрен яратып тыңлыйлар. Рус халык әкиятләре"  көне уңаеннан зурлар төркемендә "Заюшкина избушка" рус халык әкиятен сәхнәләштереп күрсәттеләр. Балаларның үз-үзләрен тотышы, русча сөйләменнән чыгып, шуны гына әйтәсе кала: әлеге әкият балалар өчен бик тә эчтәлекле һәм кызыклы.

Газизова Элвира Дилшат кызы:

24 июль көнне 2 нче кечкенәләр төркеме балалары  белән табигать кочагында ял итәргә, экскурсиягә чыктык. «Табигатьтә үзеңне ничек тотарга?» дигән сәламәтлек минуты үткәрелгәннән соң (юл йөрү кагыйдәләрен, урамда, яланда, җәмәгать урыннарында үз-үзләрен ничек тотарга кирәклекләрен  исләренә төшерү) экскурсиягә чыгып киттек. Сәяхәт барышында кошларны, агачларны, үләннәрне, бөҗәкләрне күзәттек, туган як табигәте белән хозурландык. Балалар  яланда  төрле-төрле  кызыклы уеннар уйнадылар.  Балалар экскурсиядән алган кичерешләрен киләчәктә дә онытмаслар.

Сабирова Эльвира Рафис кызы:

Татар халык әкиятләре балаларда зурларга карата хөрмәт, туган якка, әти-әнигә мәхәббәт, кош-кортларга, үсемлекләргә һәм җәнлекләргә сакчыл караш тәрбияли. Балаларның диалогик сөйләмен үстерү, фантазиясен баету максатыннан бездә "Татар халык әкиятләре" көне үтте. Балалар үзләренә ошаган рольләрне сайлап, "Өч кыз" әкиятен сәхнәләштереп күрсәтеләр. Тамашачылар да әлеге әкияттән бик канәгать калды.

Сабирова Эльвира Рафис кызы:

Безнең Актанышыбыз көннән-көн зурая, матурлана. 12 нче квартал шул исәптән әле соңгы берничә ел эченд төзелгән матур бер микроүзәккә әйләнде дисәк тә була. Без бүген балалар белән андагы урамнарны әйләнеп, өйләрне карап, табигатенә хзурланып кайттык.

Исламова Зөлфия Зәет кызы:

Бүген уртанчылар төркеменә йөрүче Хуҗина Лиананың туган көне булып узды. Төркем балалары белән Лиананың туган көненә "Ак калач" җырын җырлап уйнадык. Һәр бала үзенең иптәшенә чын күңелдән изге теләкләрен, котлауларын җиткерде, ясаган открыткаларын бүләк итте. Бәйрәм рухы барчыбызга да озын көн буена күтәренке кәеф бүләк итте.

Сабирова Эльвира Рафис кызы:

Балаларның теле кыңгырау,

Гел чыңгылдый, ява мең сорау...

Әйе, бу чыннан да шулай. Чөнки балалар һәрвакыт кызыксынучан, аларга һәрвакыт ниндидер яңалык кирәк. Бакчабызда узган  “Серле сүзләр һәм предметлар” көне уңаеннан без бүген зурлар төркемендә тозлы камыр ярдәмендә Йомры икмәк  әвәләдек һәм ярыш уздырдык. Кемнең Йомры икмәге серле, матур сүзләрне күбрәк белә икән? Әлеге уенда Саматова Алинәнең Йомры икмәге иң күп матур сүзләрне әйтте, шуңа күрә ул җиңүче дип табылды.