1 декабрь көнне мәктәбебебздә Шәфкатьлелек ярминкәсе оештырылды. Ярминкәдән кергән сумма хезмәттәшебез Багауова Ландыш гаиләсенә күчерелде.

29 ноябрь көнне авылыбыз мәдәният йортында Әниләр көне уңаеннан "Әниемнең җылы кочагы" дип исемләнгән бәйрәм чарасы үтте. Бу чара мәктәп коллективы, укучылары, ата-аналар, мәдәният йорты хезмәткәрләретарафыннан оештырылды. 

28 ноябрь  көнне мәктәбебездә башлангыч класс укытучыларының "Универсаль уку гамәлләрен формалаштыру максатыннан, дәрес һәм дәрестән тыш эшчәнлекне ата-аналар белән берлектә оештыру" темасына район семинары үтте. Укытучыларыбыз ФГОС таләпләренә туры килүче ачык дәресләр күрсәттеләр. Семинарның икенче өлешендә ата-аналарыбыз- Хуҗина А.Ф., Шакирова Э.Д., Гиздуллина А.Ф., Гиздуллин И.М. мастер-класслар уздырдылар. Әниләр көне уңаеннан "Әниемнең җылы кочагы" бәйрәм тантанасы кунакларыбыз- хөрмәтле башлангыч класс укытучылары-Әниләребез күңеленә хуш килде. Семинар эшлекле һәм уңышлы узды.

Быелгы уку елында  мәктәбебездә укучыларга Әхлак  дәресләрен хәзерге вакытта лаеклы ялда булучы хөрмәтле укытучыбыз Әфузә Мирзәхмәтовна уздыра. 26 ноябрь көнне ул укучылар белән очрашты.

24 ноябрь көнне Тукай районы Иске Абдул авылында "Җәлил укулары" бәйгесенең зона этабы үтте. Мәктәбебез укучысы Хуҗина Азилә бу бәйгедә катнашты, уңышлы чыгыш ясап кайтты. Сертификатка ия булды.

23 ноябрь көнне мәктәбебездә "Шимбә мәктәбе" кысаларында Сәләтле балалар өчен гуманитар гимназия-интернатның татар теле һәм әдәбияты укытучысы, "Укытучы-эксперт" Ландыш Фидүс кызы Әһлетдинова укучыларны олипиадага әзерләү буенча мастер-класс үткәрде.

23 ноябрь көнне районыбызда Егетләр һәм Кызларның баскетбол ярышы булып узды. Мэктәбебез кызлары 3 урынга ия булдылар. 

9 ноябрь көнне мәктәпнең тәрбия эшләре буенча директор урынбасары Н.М.Җиһангирова, ТИН укытучысы Ә.В.Шәйхелмәрдәнов  һәм укучылар Олыймән авылында яшәүче Шәкуров Гавис абыйларда булдылар. 2020 елның 9 маенда Бөек Җиңүнең 75 еллыгы уңаеннан оештырылды бу очрашу. Гавис абыйның әле дә җор телле булуы, тормышны яратуы  куренеп тора, ачык йөзе, аек акыллы булуы, йөзенең нурлылыгы җәлеп итте укучыларны. Сугыш елларының авыр булуын, Суслангердагы еллар,  Берлинны ничек алуларын бугенгедән итеп искә алды ул. Киленнәре Резида апаның тәмле ризыклары белән очрашу чәй табыны артында дәвам итте. 

8 ноябрь көнне 5 класс укучылары татар теле һәм әдәбияты укытучысы Н.М.Җиһангирова белән авылыбыз китапханәсенә бардылар. Китапханә мөдире Энҗе Фасил кызы укучыларга китапның кирәклеген, аның кадерен белү турында әнгәмә корды, укучылар яңа гына табадан төшүче китапларны күрделәр, үзләренә укырга китап алдылар.

Мәктәбебезнең 8 класс укучысы Хуҗина Азилә "Җәлил укулары" иҗат бәйгесендә катнашып район буенча 2 урынга ия булды.  Азиләне, укытучысы Рашитова Илюса Салимҗановнаны котлыйбыз!