Бүген укучыларның хоккей буенча район беренчелегенең финал уеннары тәмамланды. Ярымфиналда ПУ-80 командасын 4:3 исәбе белән, финалда 2 нче мәктәп командасын 5:4 (бул.) исәбе белән җиңеп, гимназия командасы чемпион булды. Афәрин, егетләр!

Кичә Яр Чаллы шәһәрендә “Татарстан Республикасы Мәгариф һәм фән министрлыгының 2012 елдагы эшчәнлек нәтиҗәләре һәм 2013 елга бурычлар турында” коллегия утырышы узды. Утырышта ТР Мәгариф һәм фән министры Энгель Фәттахов, ТР Премьер-министры Илдар Халиков район һәм шәһәрләрнең мәгариф бүлекләре җитәкчеләре һ.б. катнашты.
Коллегиядә гимназия директоры Ләйсән Фоатовна Нурлыева да катнашты. 

"Безнең яңа укытучы" гранты кысаларында гимназиянең яшь укытучылары Фәрдиева Регинага, Фәйзуллин Рөстәмгә һәм Нуриева Әлфинәгә кабинетлар кайтты. Кабинетларда интерактив такталар, проекторлар, документ-камералар, укыту әсбаплары һәм башкалар урнаштырылды.

11 нче февраль көнне 9а класс укучылары 8 нче класс укучыларына Казан федераль университетының “Казан химия мәктәбе” музеена виртуаль сәяхәт үткәрделәр. Химия өлкәсенә зур өлеш керткән галимнәрнең биографиясе һәм эшләре белән таныштырдылар.

Кичә “Бүләк” чаңгы базасында "Россия чаңгы юлы - 2013" Бөтенроссия ачык массакүләм чаңгы ярышлары узды. Бу чарада гимназия укытучылары һәм укучылары бик теләп катнаштылар.

Гимназияда атна буена 11 нче класста уку торышы тикшерелде. Тикшерү киләсе атнада да дәвам итәчәк. Дирекция тарафыннан ачык дәресләр каралачак, контроль эшләр, тестлар алыначак.

Гимназия укытучылары Венера Хаева-Хәмитҗанова, Азат Мирзаянов, Регина Фәрдиева, Лилия Мисбахова кичә Алабуга шәһәренең 1нче санлы гимназиясе базасында "Традиции и инновации в реализации ФГОС и НОО с использованием УМК" темасы астында узган районара семинарда катнаштылар. Алар анда мастер-класслар, чыгышлар ясадылар.

Шушы көннәрдә "Ел укытучысы - 2013" Бөтенроссия конкурсы район турының 1 нче этабы бара. Бүген Әлем авылында узучы зона этабында гимназия укытучысы Мирзаянов Азат Фәрит улына уңышлар телибез.

Химия атналыгы кысаларында гимназиянең 3 нче класс укучылары химия кабинетына экскурсия ясадылар. Химия укытучысы Рүзилә Илдар кызы һәм 8 нче класс укучылары балаларга берничә кызыклы экспериментлар һәм бик күп мәгълүматлар бирделәр, укучыларның сорауларына җавап бирделәр.

Бүген 4 нче класс укучылары рус теле һәм табигать белеме фәненнән республикакүләм тест тапшыруда катнаштылар.