8 нче октябрьдән башлап 13 октябрьгә кадәр гимназиядә математика атналыгы уздырылды. Математика укытучылары Фәрдиева Регина Равил кызы, Хаҗиева Рәмилә Әдип кызы, Галиева Рузилә Ферроль кызлары тарафыннан 5-6 классларда “Математик карусель”, 7-8 классларда “Математик викторина”, 9-10 классларда “Тамчышоу” класстан тыш чаралары; 6б, 8а классларында ачык дәресләр үткәрелде.  Атна дәвамында математика китаплары авторларына багышланган стенгазеталар күргәзмәсе эшләде. 17 октябрьдә атналыкка йомгак ясалды, җиңүчеләр кызыксындыру  бүләкләренә ия булды.

Бүген гимназиябездә, китапханә айлыгы кысаларында, якташыбыз, язучы, драматург Айгөл Әхмәтгалиева белән очрашу кичәсе үткәрелде. Айгөл Әхмәтгалиева турында презентация, авторның ,,Мин гашыйк булдым» повестена эшләнгән буктрейлер тәкъдим ителде.

Бу атнада гимназиядә "Математика атналыгы" башланып китте. Буген укучылар математик викторинада катнаштылар.

Гимназия укытучы-тәрбиячеләре тарафыннан “Иске Кормаш мәктәбе укучылары өчен шимбә мәктәбе” проекты башланып китте. Бу шимбәдә тәрбияче Хөсәинов Ленар Наил улы “Вакыт кадере” исеме астында тренинг үткәрде. 

Бүгенге класс сәгате 8а класс  укучылары өчен үзенчәлекле формада үтте. Чөнки анда класс җитәкчесе Әһлетдинова Ландыш Филүс кызының остазы – ветеран укытучы Әхмәдуллина Ләлә Шакир кызы чакырылган иде. Ләлә Шакир кызы үзе укыткан чор истәлекләре белән уртаклашты, белемнең кирәклегенә басым ясады, бүгенге шартларның уңайлылыгын искәртеп үтте. Укучылар исә үзләрен кызыксындырган сорауларга җаваплар алдылар.

Өлкәннәр ункөнлеге кысаларында, гимназиянең интернатында яшәүче укучылар, әби-бабайларын чакырып бәйрәм концерты, күңелле мизгелләр белән шатландырдылар. Шәемова Гөлъяр (5а классы) һәм Шәйхәйдаров Заһидның (9б классы) дәү әниләре Язилә Галлямова, укучыларга, үзенең “Хисле тамчылар” дип аталган шигырьләр җыентыгы белән аудиодискын бүләк итте. Очрашу кичәсе чәй табыны янында дәвам итте.

25 сентябрьдә ДАГУ “Сәләтле балалар өчен гуманитар гимназия – интернат“ның  волонтерлар отряды “Әти – әни караучысыз калган, сәламәтлекләре чикләнгән, ятим балалар өчен Минзәлә мәктәп – интернаты”на  очрашуга барды.  Волонтерлар үз  көчләре белән әзерләнгән бик матур концерт бүләк иттеләр. Балаларга уку кирәк-яраклары, тәм-томнар өләштеләр, кием – салымнарны тапшырдылар. Педагог-организаторлар Алсу Мирзамухаметовна һәм Миләүшә Рәдисовна җитәкчелегендә дустанә һәм мавыктыргыч бәйрәм кичәсе оештырылды. Укучылар, Минзәлә мәктәбе коллективының кунакчыллыгына, тәртипкә, чисталыкка, балалар өчен тудырылган шартларга, монда эшләүчеләрнең  чын мәгънәсендә яхшы күңелле кеше булуларына сокланып кайттылыр.

Очрашуга барыр алдыннан  гимназиякүләм “Игелек кыл!” акциясе оештырылды. Акциядә  барлык укучылар, укытучылар, ата – аналар да  бик теләп катнаштылар.

Яшьлегеңдә күп тырышсаң, эшкә бирсәң чын күңел... 9-11 класс укучыларының һөнәр сайлау чоры да якынлашып килә. Аларга һәртөрле ярдәм күрсәтү максатыннан,  төрле профессия әһелләре белән очрашулар оештырыла, экскурсияләр планлаштырыла. Бүген исә, Чаллы пенсия фонды идарәсенең Актаныш муниципаль районы буенча клиентларга хезмәт күрсәтү бүлеге җитәкчесе Басыйров Булат Мөзаллиф улы белән очрашу булып узды. Укучылар пенсия билгеләүдәге үзгәрешләр, кайсы һөнәр иясенең нинди өстенлекләргә ия булулары турында мәгълүматлар алдылар, үзләрен кызыксындырган сорауларга җаваплар тыңладылар.