Бүген бакчабызда исламда иң олы бәйрәм - Корбан  бәйрәме үткәрелде. Балалар барысы да түбәтәй киеп, яулыклар ябып залга җыйналды. Бәйрәм кунагы итеп абыстай Сәкинә апа чакырылды. Ул балаларга әдәп-әхлак турында сөйләде, динебездәге әлеге бәйрәмнең әхәмиятен аңлатты. Соңыннан Сәкинә абыстай илебезгә тынычлык, балаларга, аларның әти-әниләренә исәнлек-саулык, җитәкчеләргә уңышлар теләп догалар кылды. Аңа җавап итеп балалар үзләре белгән догаларны сөйләп күрсәттеләр.

10 октябрь көнне бакчабызда "Мәктәпкәчә яшьтәге балаларның сөйләм телен үстерүдә белгечләрнең бердәм эшчәнлеге " темасы астында гомуми әти-әниләр җыелышы үткәрелде. Җыелышта логопед Вәлиева Гөлнара Ринатовна, рус телен өйрәтүче Вафина Лилия Ильфировна, инглиз телен өйрәтүче Аубакирова Гөлназ Альфредовна зурлар, мәктәпкә әзерлек төркеме балалары белән әти-әниләргә күңелле эшчәнлекләрен күрсәттеләр. Җыелышта махсус чакырылган Сабаның социаль яклау хезмәткәрләре дә катнашты. Алар әти-әниләргә  яңача түләү тәртибе турында тәфсилләп аңлаттылар. Бакчабыз мөдире Исрафилова Миләүшә Корбангалиевна бакчабызның эшчәнлеге турында әти-әниләрне тирәнтен таныштырды.

Гомуми әти-әниләр җыелышында иң элек логопед Вәлиева Гөлнара Ринатовна мәктәпкә әзерлек төркеме балалары белән "Балаларның сөйләм теле кимчелекләрен бетерү өстендә эшләү алымнары" темасы астында телгә гимнастика ясау алымнарын күрсәттеләр. Шулай ук логопед баланың сөйләме дөрес үсеш алсын өчен нинди күнегүләр һәм бала белән нинди эшләр башкарырга кирәклеге турында сөйләде.

Җыелышта рус телен өйрәтүче Вафина Лилия Ильфировна җитәкчелегендә зурлар һәм мәктәпкә әзерлек төркеме балалары "Шалкан" әкиятен русча  яңачалаштырып әти-әниләр игътибарына тәкъдим иттеләр. Әкият тавыклар биюе, шигырьләр, рус такмаклары белән үрелеп барды.

Инглиз телен өйрәтүче Аубакирова Гөлназ Алфредовна мәктәпкә әзерлек төркеме балалары белән "Алтын көз" дип исемләнгән күренеш күрсәттеләр. Алар инглиз телендә аралашып, җырлап, шигырьләр сөйләп әти-әниләрне куандырдылар.

"Икмәк - яшәү терәге" атналыгының төп  максаты итеп тәрбиячеләр балаларда  игенче хезмәтенә хөрмәт тәрбияләү, икмәкнең табынга килгәнче нинди юллар үтүен тасвирлап сөйләүне куйдылар. Мәсәлән, без-зурлар төркеме балалары белән икмәк турында атна дәвамында җырлар, шигырьләр өйрәндек, кул эшләре эшләдек. Рәсемнән "Кайнар икмәк" темасына ясадык. Рәсем ясар алдыннан икмәк табында  булсын өчен кемнәр нинди хезмәт куйганын тасвирлап сөйләштек. Әвәләү эшчәнлегендә "Кызарып пешкән ипиләр" темасына балалар белән пластелиннан ипикәйләр әвәләдек. Иҗади күмәк эшебездә әти-әниләрнең дә ярдәме тиде - без "Икмәк - тормышның нигезе" дип аталган игенчче хезмәтенә багышланган, мәкальләрдән торган китапчык ясадык. Күмәк эшебез әти-әниләргә дә, балаларга да бик ошады.

Рәсемдә зурлар төркеме балалары "Кайнар икмәк" темасына рәсем ясаган вакытлары.

Балаларның әвәләү эшчәнлегендә ясаган кызарып пешкән ипикәйләре менә шулай "пешеп" өлгерде

Бүген һәр группа да иртәнге яктан ук үзенчәлекле һәм шатлыклы иде. Бу сөенечкә тагы да ямҗ өстәп, кулларына көз күчтәнәчләреннән: яшелчә, җиләк - җимешләр, яфраклардан ясалган әйберләр тотып, матур итеп киенгән балалар залга җыелдылар. Чөнки бездә бүген "Сөмбелә" бәйрәме була. "Көзге байлык" дип аталган күргәзмә дә оештырылды. Әти-әниләре һәм балалар тырышлыгы белән ясалган бу күргәзмәләрдән күзләр камаша: гади генә күренгән яшелчәләрдән дә  төрле-төрле үзенчәлекле әйберләр ясап була икән.Бәйрәм дә бик матур булды, балалар шигырьләр сөйләделәр, җырлар башкардылар, биеделәр. Ә инде залга Көз кызы - Сөмбелә килеп кергәч балаларның күңелләре тагы да күтәрелеп китте. Бәйрәм бик матур һәм күңелле үтте.

 Мәктәпкә әзерлек төркеме тәрбиячесе Әнисә Гыйлемханова. 

"Сөмбелә" бәйрәме атнаның 2 көненә- 3 нче һәм 4 нче октябрь көннәрендә үткәрелде.  Чәршәмбе көнне мәктәпкә әзерлек һәм зурлар төркеме балалары бәйрәм итте. Ә бүген исә, 2 нче кечкенәләр һәм уртанчылар төркеме балалары "Сөмбелә"не тәбрикләде. Бәйрәмнәр бик күңелле, оешкан төстә үтте.Һәр төркем балалары бик матур итеп шигырьләрен сөйләделәр, биеделәр, күңелле уеннар уйнадылар. Бәйрәмне бигрәк тә төрле яшелчәләрдән эшләнгән кул эшләре тулылындырды. Әти-әниләр бу чарага бик җитди килгән. Без үз чиратыбызда, катнашкан һәр гаиләгә зур рәхмәтләр әйтәбез, киләсе еллар да тыныч һәм шулай мул булсын дип теләп калабыз.

Ни арада җәй үткән

Алтын көз килеп җиткән.

Җимешләр өлгергәч, бакча

Бигрәк тә матур икән!