5А сыйныфы укучылары "Татар Бистәсе" интерактив музеенда кунакта булып кайттылар. Милли музей хезмәткәрләре балаларны бик кунакчыл каршы алдылар, тәмле чәйләре һәм баллы ризыклары белән сыйладылар.
Экскурсия барышында укучылар Кабан күле серләре белән таныштылар, Юнысов мәйданы, Мәрҗәни, Апанай мәчетләре тарихы, Казан татарларының элек ничек яшәгәннәре белән таныштылар.

5В сыйныфы укучылары табигать кочагында ял итеп кайттылар. Укучылар саф һавада рәхәтләнеп төрле уеннар уйнадылар, уңай эмоция һәм яхшы кәеф алдылар!

2024 нче елның икенче яртыеллыгына газета - журналларга язылу дәвам итә. Гимназия укучылары "Сабантуй" һәм "Салават күпере" журналларына ел саен яратып языла. "Сабантуй" журналындагы бирем - уеннарны яратып чишәләр, үзләре дә төрле бәйгеләрдә катнашырга тырышалар.
Гимназия укучылары бик сәләтле:
- "Сабантуй" журналының май ае саны тышлыгын гимназиянең "Хәят" ансамбле егетләре бизәде;
- Апрель ае санының "Директорга биш сорау" сәхифәсендә гимназия директоры Гөлшат Әбүзәр кызы Фәсхетдинова белән әңгәмәне укырга була;
- 4В сыйныфы укучысы Инсаф Кәримов иҗат итәргә ярата, "Сабантуй" журналы оештырган "Каләмдәш" һәм "Мин журналист булам" онлайн-дәресләрдә актив катнаша.
Җәйге каникулларда да китап - журналларны укучыларыбыз яратып укыр дигән өметтә калабыз!

Дәшә серле юллар,
Башта төрле уйлар,
Яшь йөрәктә чыңлый мең сорау.
Якты юллар теләп,
Матурлыкка өндәп
Саубуллаша көмеш кыңгырау..
24 нче май көнне гимназиябездә 11 нче сыйныф укучылары өчен соңгы кыңгырау чыңлады. Бәйрәм белән укучыларны директорыбыз Гөлшат Әбүзәровна, Вахитов һәм Идел буе районнары буенча укыту - методик сектор мөдире Миләүшә Василовна, директор урынбасарлары, 1 нче сыйныф укучылары, әти - әниләр һәм яраткан укытучылары котлады.
Тантанада күңелле һәм моңсу мизгелләр күп булды. Әйе, вакыт сиздерми генә үтеп киткән. Кызыклы дәресләр, шау - шулы тәнәфесләр, төрле сәяхәтләр артта калды. Алда беренче сынаулар көтә...
Кадерле чыгарылыш сыйныф укучылары! Сезгә күңел күтәренкелеге, оптимизм, үз - үзегезгә ышаныч, якты киләчәк һәм уңышлар гына телибез! Ак юллар сезгә, укучылар!!!

Видеога сылтама: https://vk.com/club216931602?z=video-216931602_456239288%2F1c7e45561706dc22f0%2Fpl_wall_-216931602

Гимназия китапханәсендә 5А сыйныфы укучылары белән "Китапханә серләре" дип исемләнгән әдәби дәрес үткәрелде. Укучылар китап дөньясына мавыктыргыч сәяхәт ясадылар. Беренче китапханәләр ни сәбәпле, ничек, кайда, кайчан барлыкка килгән дигән сорауларга җаваплар таптылар.

Гимназиябез укучылары "Россия - минем тарих" паркында 8 - 11 нче сыйныфлар арасында үткәрелгән "Своя игра" дип аталган интеллектуаль бәйгедә I урынны яуладылар. Укучыларыбызны һәм җитәкчеләре Эльмира Расыховнаны чын күңелдән котлыйбыз!!!

23 нче май көнне гимназиядә 2023 - 2024 нче уку елы нәтиҗәләре буенча тантаналы рәвештә линейкалар үткәрелде. Линейка барышында төрле бәйгеләрдә, олимпиадаларда, гимназия тормышында актив катнашкан укучыларыбыз бүләкләнделәр!
Гимназия директоры Гөлшат Әбүзәровна җәйге каникул вакытында үз - үзеңне тоту кагыйдәләре белән таныштырды, укучыларга күңелле һәм файдалы яллар теләде!

2А сыйныфы укучылары "Союзмультпарк"та сәяхәттә булып кайттылар. "Балалар әлеге могҗизалы урыннан бик канәгать калдылар. Шундый рәхәт ял оештырган өчен сыйныфның әти - әниләренә зур рәхмәт!" - дип теләкләре белән уртаклашты сыйныф җитәкчесе Гөлфия Рөстәмовна.

2Б сыйныфы укучылары "Живопись шерстью" дигән мастер - класста катнаштылар, эшләү техникасы белән таныштылар, вакытларын кызыклы һәм файдалы үткәрделәр!

Гимназиябез активистлары тәрбия эшләре буенча директор киңәшчесе Гөлчәчәк Әсхатовна һәм ЮХИДИ идарәсенең профилактика бүлегенең әйдәп баручы белгече Сәгдия Салиховна җитәкчелегендә "Солнечный" реабилитация үзәгендә булып кайттылар. Сәгдия Салиховна балаларга юлда куркынычсызлык кагыйдәләре турында сөйләде, укучыларыбыз үзләренең музыкаль чыгышларын тәкъдим иттеләр.