Сандугач буласың килсә

Шигъриятнең талында,

Моң чишмәсе ургып торсын

Нәни йөрәк-җаныңда...

24 нче апрельдә   И.Х. Садыйков исемендәге Балалар һәм яшьләр иҗаты сараенда Түбән Кама муниципаль районы  күләмендә укучы балалар арасында “Көйле, моңлы татар җыры” бәйгесенең  ХI нче шәһәркүләм йомгаклау туры үткәрелде.

 Бу бәйге Түбән Кама муниципаль районы   мәгариф идарәсе һәм Бөтендөнья татар конгрессының Түбән Кама бүлеге белән берлектә уздырылды. Гала концерттта 1-4 нче, 5-6 нчы, 7-8 нче сыйныфлар арасында җиңүче дип табылган  сыйныф коллективлары хор  белән катнашты; ансамбльләрнең чыгышлары тыңланды.

Чыгышлардан соң зал түземсезлек белән бүләкләү тантанасын көтте... I, II, III  урыннар алган ансамбльләрне һәм хор коллективларын бүләк алырга сәхнәгә берәм-берәм чакырып тордылар. Һәм, ниһаять, быелгы бәйгенең дә җиңүчеләре билгеле.

Лицеебызның  хор коллективы (5ю)  “Көйле, моңлы татар җыры – 2019” муниципаль район бәйгесенең III нче дәрәҗә лауреат Дипломына лаек булды (җитәкчеләре: Короткова И.В., Малиновская О.Н.)

Без “Көйле, моңлы татар җыры - 2019” муниципаль район бәйгесен оештырган Бөтендөнья татар конгрессының Түбән Кама бүлеге рәисе  татар җанлы Рөстәм Мәҗит улы Ганиевка  бик тә рәхмәтлебез, чөнки аның ярдәме белән  2013-2014 нче уку елында башлангыч сыйныф укучылары өчен 12, 2015-2016 нчы уку елында 7-8 нче сыйныф укучылары өчен 10, 2017-2018 нче  уку елында башлангыч сыйныф укучылары өчен 3 пар милли кием тектерә алдык.

Шулай ук музыка укытучысы Короткова Инга Валентиновна,  татар теле укытучылары Әбуярова С.М., Гыйльмуллина Г.Р., Мифтахова Э.Ф., сыйныф җитәкчеләре Кашипова А.Н., Кирина Е.В., бәйгедә катнашкан барлык балаларга, ата-аналарга рәхмәтебезне белдерәбез.

Шәһәребездә мондый чаралар булганда, милли традицияләребез, буыннан-буынга күчеп килүче җыр-моңнарыбыз киләчәк буынга җиткерелер.

Милли мәгариф буенча директор урынбасары Н.И. Габидуллина