21нче декабрьдә Халыклар иҗаты йортында Россиянең атказанган, Татарстанның атказанган һәм халык артисты Айдар Фәйзрахманов җитәкчелегендәге Татарстан Республикасы Дәүләт фольклор музыка ансамбленең концерты үткәрелде.             

Шыгрым тулы зал... Могҗиза көткән күзләр үзләре дә сизмәстән, сәхнәдә төбәлделәр...һәм, ниһаять, менә ул, данлыклы ансамбль!!!

 Казан артистларына Түбән Кама Халыклар иҗаты йортында үз осталыкларын күрсәтергә насыйп булды. Аларның сәхнәдә оста итеп башкарылган биюләре, фольклор музыкасы, искиткеч зәвык белән тегелгән милли киемнәре безне үзенә җәлеп итте, соклану һәм горурлык хисләре уятты. Шуны да әйтергә кирәк:  концерт, нигездә, рус телендә алып барылды. Татар теле һәм әдәбияты укытучысы Насыйрова Фәридә Мирсәтовна белән бүгенге концертны карарга килгән 6г сыйныфы укучыларына да (сыйныф җитәкчесе Мифтахова Э.Ф.), әти-әниләренә дә, укытучыларга да Татарстан Республикасы Дәүләт фольклор музыка ансамбленең югары дәрәҗәдәге профессиональ чыгышы бик ошады. Концерт искиткеч, гаҗәеп матур булды!

 Концерттан чыкканда, бүгенге кичәдән берәүнең дә битараф калмаганлыгы күзгә ташланды: күтәренке кәеф, йөзләрдә елмаю, итагатьле сүзләр әйтү... Эх, гел шулай булса иде! Изге нур, җылы хисләр, күңел күтәренкелеге алыйм дисәң, концертка бар икән...

Хөрмәтле артистларыбыз!  Безнең җаннарыбызга иман нуры, рухи сафлык өстәвегез өчен Сезгә ихлас күңелдән рәхмәтлебез. Киләчәктә дә иҗади хезмәттәшлек өзелмәсен. Уңышлар Сезгә!

Габидуллина Н.И., милли мәгариф буенча директор урынбасары