20нче декабрьдә Халыклар иҗаты йортында Муса Җәлил исемендәге Республика премиясе лауреаты  Түбән Кама ”Җидегән чишмә” әдәби-музыкаль берләшмәсенең  чираттагы кичәсе үткәрелде.  Бу юлы ул  Туфан Миңнуллин исемендәге Түбән Кама татар дәүләт драма театрының 30 еллыгына багышлап “Беркем дә каршы торалмый сәхнә әйләнешенә”исеме  астында үтте.

2019 нчы ел  Россиядә театр елы дип игълан ителде. Бүгенге Түбән Кама татар дәүләт драма театры артистлары белән очрашу кичәсенә бик күп кунаклар чакырылган иде. Аралар ерак булуга карамастан, Казан шәһәреннән якташыбыз, язучы, җәмәгать эшлеклесе, Татарстан Республикасы Дәүләт Советы депутаты, Габдулла Тукай бүләге иясе Разил Вәлиев та килгән. Мәртәбәле кунаклар арасында Түбән Кама муниципаль районы башлыгы, шәһәребез мэры Айдар Рәис улы Метшин, шулай ук Гамил Әсхәдуллин җитәкчелегендә “Мунча ташы” артистлары да бар иде. 

Түбән Кама татар дәүләт драма театры артистларына бу кичтә берничә образны уйнарга туры килсә дә, аларның сәхнәдә күңел биреп уйнаулары безне үзенә җәлеп итте, соклану һәм горурлык хисләре уятты.

Хөрмәтле артистларыбыз!  Безнең җаннарыбызга иман нуры, рухи сафлык өстәвегез өчен Сезгә ихлас күңелдән рәхмәтлебез. Киләчәктә дә иҗади хезмәттәшлек өзелмәсен. Уңышлар Сезгә!

Габидуллина Н.И., милли мәгариф буенча директор урынбасары