Әтиләр көне уңаеннан мәктәбебездә педагог-оештыручы Рамилә Нургаяновна һәм сыйныф җитәкчеләре көче белән «Безнең яраткан әтиләребез» исеме астында фотокүргәзмә оештырылды. Әлеге күргәзмәне мәктәбебез укучылары үзләренең әтиләре белән төшкән фотосурәтләр белән тулыландырдылар.
Фотокүргәзмә һәркемдә зур кызыксыну уятты. Һәр фотосурәттән җылылык, якынлык һәм чиксез ярату бөркелә. Биредә әтиләр балалары белән балыкта, спорт ярышларында, хезмәттә һәм ял минутларында сурәтләнгән. Балалар зур горурлык белән үзләренең үрнәк, батыр һәм ышанычлы әтиләре турында сөйләделәр.
Әти кеше — гаиләнең ныклы терәге, бала тормышында төп үрнәк булып торучы олы зат. Күргәзмәдә катнашкан һәм әтиләренә карата булган җылы хисләрен фотолар аша җиткергән барлык укучыларыбызга зур рәхмәт!