6 нчы март көнне мәктәбебездә Халыкара хатын-кызлар көненә багышланган бәйрәм кичәсе булып узды. Әлеге бәйрәм кичәсенә укучыларыбызның кадерле, яраткан әниләре чакырылган иде. Язгы кояш нурына күмелгән әлеге бәйрәмдә мәхәббәт, матурлык, ана назы, ягымлылык, мәрхәмәтлелек, шәфкатьлелек, сабырлык, хатын-кызга ихтирам кебек мәңгелек кыйммәтләр чагылыш таба. Кичә программасы мавыктыргыч уеннар, җыр-биюләр, мастер-класс, котлау өлеше һәм дискотекадан торды. Әлеге кичәне тәрбия эшләре буенча директор урынбасары Яббарова Айгөл Илгизәр кызы җитәкчелегендә укытучылар коллективы әзерләде. Бәйрәм чарасы бик күңелле, җылы һәм матур үтте. Хөрмәтле әниләрне, әбиләрне, апа-сеңелләрне, кызларны чын күңелдән бәйрәм белән тәбрик итәбез! Сезнең тормышыгыз яхшылык һәм яктылык, мәхәббәт, якыннарыгызның күңел җылысы һәм игътибары белән тулып, йөзләрегез елмаюдан яктырып, нурлар чәчеп торса иде! Гаиләләребезгә, илебезгә тынычлык, бәрәкәтле гомер, бәхетле киләчәк телибез!