27 нче февраль көнне Ядегәр авылы мәдәният йортында Бөек Җиңүнең 80 еллыгына багышланган мәктәбебез укучылары һәм аларның җитәкчеләре көче белән әзерләнгән "Җыр керсен күңелгә..." исемле иҗат концерты булып үтте. Әлеге концертка махсус кунак буларак, Ядегәр җирлегендә яшәүче кайнар нокталарда хәрби хезмәт үткән һәм махсус хәрби операциядә катнашучы ир-егетләр, аларның гаиләләре чакырылды. Концерт программасы укучыларыбызның патриотик темага башкарган дәртле җыр-биюләре, матур шигырьләре белән үрелеп барды. Зал тутырып килгән тамашачыларның көчле алкышлары әлеге бәйрәмгә тагын да ямь өстәде. Шушындый тирән эчтәлекле, матур кичәне әзерләүгә көч керткән барлык укучыларыбызга, сыйныф җитәкчеләренә, оештыручыларга һәм концертка килгән тамашачыларга зур рәхмәтебезне белдерәбез! Аерым рәхмәтебезне мәктәбебезнең җыр укытучысы Якупова Гөлия Рафис кызына, бию түгәрәге җитәкчесе Мубаракова Гөлнара Рамазан кызына, педагог-оештыручы Гильмуллина Рамилә Нургаян кызына һәм тәрбия эшләре буенча директор урынбасары Яббарова Айгөл Илгизәр кызына җиткерәбез! Илебезгә тынычлык, барыгызга да сәламәтлек, гаилә иминлеге һәм уңышлар теләп, киләсе очрашуларда да сезне көтеп калабыз!