Мәктәбебездә атна саен алдагы атнага нәтиҗәләр ясап, иртәнге линейка уздырыла. Әлеге линейка вакытында дежур укучыларның чыгышы тыңланыла, мәктәп тормышы белән бәйле яңалыклар турында сөйләнелә һәм төрле өлкәдә уңышка ирешкән укучыларыбыз белән укытучыларыбызны котлау оештырыла. Бу атнада да, район, республика һәм бөтенрәсәй күләмендә үткәрелгән бәйгеләрдә уку, спорт һәм сәнгать буенча җиңү яулаган укучыларыбызны һәм аларның җитәкчеләрен котлап киттек. Район күләмендә үткән "Тату сыйныф серләре" бәйгесендә 8 нче сыйныф укучылары, аларның әти-әниләре һәм сыйныф җитәкчесеннән торган команда 3 нче урынга лаек булды!  Республика күләмендә үткән "Мирасның балкышы" бәйгесендә Мубаракова Гөлнара Рамазан кызы җитәкчелегендәге "Ядкәр" бию коллективы 1 нче һәм 2 нче урыннар яулады! 6 нчы сыйныф укучысы Исмагилов Ильяс республика күләмендә көрәш буенча уздырылган ярышта 1 нче урынны яулап, Татарстан чемпионы исеменә лаек булды! Җитәкчесе - Исмагилов Фәнил Фәйзелхак улы. Саратов шәһәрендә үткән Бөтенрәсәй фәнни-практик конференциясендә катнашып, укучы кызларыбыз Башарова Ясминә һәм Файзуллина Алсу 1 нче урыннарга ия булдылар! Җитәкчеләре: Гыйльмуллина Рамилә Нургаян кыззы, Габбасова Гамилә Мәгъсүм кызы һәм Мухаметзянова Ләйсән Хәмит кызы.  Афәрин, укучылар һәм аларның остазлары! Барыгызны да әлеге зур җиҗүләрегез белән котлыйбыз һәм алга таба да зур уңышларга ирешүегезне теләп калабыз!