Халыкара балаларны яклау көне уңаеннан 31 нче май көнне Ядегәр авылы җирлегенең Сабантуй мәйданында мәктәбебез "Балалар сабан туе"н үткәрде. Әлеге чара балалар бакчасында тәрбияләнүче балалар, мәктәп укучылары һәм авылыбыз кунаклары өчен чын балачак бәйрәме булды. Бәйрәмдә Сабантуйга хас булган милли уеннар, татарча көрәш, җыр-биюләр белән беррәттән төрле спорт уеннары, ярышлар һәм бәйгеләр дә оештырылды. Мәктәбебезнең алдынгы укучыларын, спортчыларын, иҗатта зур җиңүләр яулаган балаларны һәм аларның җитәкчеләрен тантаналы рәвештә бүләкләделәр. "Ел укучысы" исеменә 8 нче сыйныфта белем алучы Файзуллина Алсу лаек булды. Афәрин! Сабантуйның баш батыры булып, 8 нче сыйныф укучысы Ямалиев Марсель калды. Чын күңелдән котлыйбыз!Сабантуйда шулай ук, барлык катнашучыларны казанда пешкән тәмле пылау белән дә сыйладылар. Чара бик күңелле һәм матур үтте. Балалар сабан туен оештыруга һәм үткәрергә үз көчен керткән барлык укытучыларга, мәктәп хезмәткәрләренә, авыл җирлеге халкына һәм иганәчеләргә олы рәхмәтебезне белдерәбез!