Җиңү көне җиңел бирелмәде,
Җыр җырланмый шөһрәт-дан өчен.

Йөрәк җылый һәрбер солдат өчен,
Егермеләп миллион җан өчен...

Бөек Ватан сугышының дәһшәтле һәм канкойгыч 1418 көне һәм төне кешелек хәтереннән мәңге чыкмас. Бу көрәштә илебезнең миллионлаган намуслы һәм батыр ул-кызлары җирдә тынычлык  һәм бәхет өчен гомерләрен бирделәр. Бөек Җиңүнең 79 еллыгы уңаеннан мәктәбебездә матур бәйрәм чарасы уздырылды. Укучылар  җыр-биюләр, шигырьләр, сәхнәләштергән күренешләр аша 1418 көнгә сузылган дәhшәтле сугышның никадәр канкойгыч һәм мәрхәмәтсез булуын, 1945 нче елның чәчәкле язы алып килгән Бөек Җиңү көненең никадәр тантаналы, изге һәм кадерле икәнен тагын бер кат искәрттеләр. Әлеге чарада катнашкан Ядегәр авылы җирлеге башлыгы Файзуллин А.Н., Кукмара муниципаль районы Мәгариф идарәсе җитәкчесе Ахмадуллин И.И., «Восток» агрофирмасы җитәкчесе Леонтьев А.И., мәктәбебез директоры Нуриев Р.Р. һәм башка кунаклар да үз чыгышларында әлеге истәлекле датаның илебез һәм кешелек тормышында бик мөһим булган батырлык һәм сүрелмәс дан бәйрәме икәнлеге хакында сөйләделәр. Һәммәгезне дә ихлас йөрәктән Бөек Җиңүнең 79 еллыгы белән тәбрик итәбез! Сезгә ныклы сәламәтлек, озын гомер, күңел күтәренкелеге, шатлык һәм иминлек телибез! Илләребез тыныч, күкләребез аяз булсын.