26-28 апрель көннәрендә Ядегәр урта гомуми белем бирү мәктәбе директоры Нуриев Рәмис Расим улы укытучылар делегациясе һәм "Ядкәр" бию төркеме кызлары белән берлектә Бөтендөнья татар конгрессы Башкарма комитеты җитәкчесе урынбасары – Милли мәгариф, мәдәният һәм спорт комитеты җитәкчесе Зиннатуллин Рәзил Ринат улы җитәкчелегендә Саратов шәһәренә сәяхәт кылдылар. Әлеге сәяхәт кысаларында Мубаракова Гөлнара Рамазан кызы җитәкләгән "Ядкәр" бию төркеме кызлары “Идел йолдызлары” дип исемләнгән Төбәкара татар балалары  фестивалендә катнашып, "Татар биюе" номинациясендә Гран-при дәрәҗәсендәге диплом һәм истәлекле бүләкләргә лаек булдылар. Афәрин! Котлыйбыз! Әлеге фестивальгә Россиянең күп кенә регионнарыннан  катнашучылар җыелган иде. Алар үзләренең дәртле җыр-биюләре, шигырьләре һәм сәхнә әсәрләре аша татар мәдәниятенең никадәр бай икәнлеген искәрттеләр. Фестиваль татар теле, милли мәдәният бәйрәменә әверелде. Шулай ук, сәяхәт барышында мәктәбебез делегациясе Арча шәһәренең Г.Курсави исемендәге күппрофильле лицее делегациясе белән берлектә Саратов шәһәренең Советлар Союзы Герое Рамаев исемендәге милли (татар) гимназиясендә семинар-киңәшмәдә катнашты. Семинарда Татарстан мәктәпләре һәм Саратов гимназиясе белән үзара хезмәттәшлек турында килешүләр төзелде. Әлеге сәяхәт һәм фестиваль барлык катнашучылар күңелендә истәлекле мизгелләр һәм җылы хисләр калдырды. Барлык оештыручыларга олы рәхмәтебезне җиткерәбез!