21 нче октябрь көнне мәктәбебезнең 9 нчы сыйныф укучылары сыйныф җитәкчесе Рахимова Р.Р. белән берлектә Кукмара аграр көллиятендә бердәм Ачык ишекләр көнендә булып кайттылар. Иң беренче булып Янил, Ядегәр, Чура мәктәбеннән килгән укучыларны һәм аларның әти-әниләрен  уку корпусында Кукмара аграр көллияте директоры Гатин Азат Халилович сәламләде. Ул кунакларга көллиятнең бүгенге тормышы турында сөйләде. “Кар десанты” эзләнү отряды җитәкчесе Самигуллин Раниф Хадиуллович укучыларны отрядның эшчәнлеге белән таныштырды. Узган уку елындагы экспедициядә төшерелгән фильмны күрсәтте.  Шуннан соң укучылар өчен көллиятнең укыту-лаборатор комплекслары буенча экскурсияләр оештырылды. “Профессионалитет” проекты нигезендә заманча җиһазландырылган “цифралы игенчелек” (“цифровое земледелие”), “машина-трактор паркын эксплуатацияләү” остаханәләре, “сити-фермерство”, “агрономия”, “авыл хуҗалыгы машиналарын эксплуатацияләү”, “сәнәгать бакчасы” остаханәләре балалар күңелендә бик тирән тәэсирләр калдырды.