12 февраля проводилось устное собеседование по русскому языку с учащимися 9 класса. Учащиеся справились заданиями.

11 нче февраль көнне мәктәптә Парламент дәресе үткәрелде. Дәрестә авыл советы депутатлары катнашты. Дәресне тарих укытучысы Гүзәл Завитовна алып барды. Укучыларга Парламент составы, аның эшләре турында мәгълүмат бирелде

ВУЗларда укучы студентлар мәктәп укучылары белән очрашты. Алар үзләренең шатлыклары, сөенечләре белән уртаклаштылар. Чөнки һәрберсе дә чираттагы сессияләрен уңышлы төгәлләгәннәр. Каникулда рәхәтләнеп әти-әниләре янда ял иткәннәр. Очрашуда укучыларга үзләре укый торган уку йортына керү шартлары, имтиханнар бирү тәртибе, укуларның ничек барышы, гомумән кызыклы, борчулы, күңелле студент тормышлары турында бик теләп, бик рәхәтләнеп сөйләделәр. Чыгарылыш сыйныф укучыларын үзләре янына укырга килергә чакырдылар. Һәр укучыга да тырышып укырга кирәклеген әйттеләр. Үз чиратындә укучылар аларга төрле сораулар бирделәр. Әңгәмә бик җанлы үтте.

  Хәрби-патриотик айлык кысаларында мәктәбебездә күп төрле чаралар үткәрелә. Шуларның берсе- иң истәлеклесе, авылыбызның бердәнбер Бөек Ватан сугышы ветераны Котдус бабай белән очрашу. Котдус бабайга да инде 93 яшь. Шулай булса да укучылар белән очрашуларга ул бик теләп килә. Балаларга  фронт юлларында күргәннәрен, сугыш китергән авырлыклар, сугыштан соңгы тормышы турында бик тәфсилләп сөйли. Иң зур теләге: бүгенге балалар сугыш афәтләрен күрмәсеннәр; илләр тыныч булып, бәхетле яшәсеннәр, тырышып укысыннар. Котдус бабайның үзенә дә бәхетле картлык, бәрәкәтле тормыш телибез. Изге теләкләрең,  ихлас сүзләрең өчен рәхмәт, Котдус бабай!

Мәктәбебездә “Театр нурга илтә” дигән түгәрәк эшли. Анда йөрүче 5, 6 нчы сыйныф  укучылары спектакльләр куярга өйрәнәләр.  Шундый спектакльләренең берсен укучыларга һәм студентларга уйнап күрсәттеләр. Ул Г.Камалның “Беренче театр” комедиясе иде. Укучылар бик матур уйнадылар. Булдырасыз, балалар! Сезгә тагын да зур тырышлык һәм уңышлар телибез.

Укучылар ел дәвамында, китапханәләргә йөреп, кызыклы китаплар укыйлар. Ел ахырында иң күп китап укучылар билгеләнә. Ул бик зур бәйрәм-Китап бәйрәме итеп үткәрелә. Быел да бу бәйрәм бик кызыклы һәм эчтәлекле итеп үткәрелде. Балалар китап тарихы, китапханәләр турында, китапларның укучы кулына ничек килеп җитүе турында бик күп мәгълүмат җиткерделәр. Китап турында матур-матур шигырьләр сөйләделәр. Китапханәче апалары иң күп китап укучыларны һәм иң күп китап укыган классларны грамоталар һәм бүләкләр белән билгеләп үтте. Киләчәктә дә китаптан аерылмагыз, балалар.

 ТАССР га 100 ел тулу уңае белән мәктәп китапханәсендә ТАССР логотибы астында стенд төзелде.

-Әлифба, Әлифба! Китәсең бит инде

Җыр итеп җырлыйбыз иң соңгы битеңне.

  Бүген (5 февраль) мәктәбебездә бик матур бәйрәм-“Әлифба” бәйрәме булды. 1 нче сыйныф укучылары “Әлифба” китабын өйрәнеп бетерделәр. Бу - зур җиңү. Менә шул шатлыкларын әти-әниләре, укытучылар белән бергәләп бәйрәм иттеләр. Алар хәзер укый, яза беләләр. Матур җырлар да күп өйрәнделәр, математика буенча да тиз генә исәплиләр. Алга таба да зур тырышлык, уңышлар телибез.

Җиңүнең 75 еллыгына башланган акция дәвам итә. Укучыларыбыз, актив рәвештә китапханәгә йөреп,  сугыш турында язылган әдәби китаплар укыйлар.

1 нче   февральдән мәктәпләргә  1 нче сыйныфка укырга керүче балаларның  әти-әниләреннән гаризалар кабул итү башланды. Шул уңай белән булачак 1 нче сыйныф укучыларының әниләрен мәктәпкә чакырдык. Аларга безнең мәктәптә уку-укыту тәртипләре, укучы балаларга кирәкле әсбаплар, мәктәп формасы  нинди булырга тиешлеге аңлатылды. Укырга керүче балалар белән әзерлек курслары башлануы турында әйтелде. Менә балалар мәктәптә. Алар мәктәптә  кулларына ручка тотарга, язарга, кайбер фигураларны ясарга өйрәнеп караячаклар. Быел мәктәпкә 5 бала укырга керер дип көтелә.