Язгы мәрхәмәтлелек атналыгы кысаларында үтүче "Мәрхәмәтле эшләр көне" уңаеннан безнең мәктәп коллективы, Бөгелмә шәһәренең "Ялкын" приютында тәрбияләнүчеләргә, матди  ярдәм оештырды.Безнең мәктәп коллективы приют өчен уку кирәк-яраклары, уенчыклар, кием салым җыйдылар. Барлык  тупланган әйберләр 24нче апрель көнне приютка илтеп тапшырылды. 

Мәрхәмәтлелек атналыгы кысаларында,"Мәрхәмәтле сүз көне"(День доброго слова) уңаеннан безнең мәктәптә авылыбызда яшәүче тыл ветераннары белән очрашу үтте. 38 ветеранга чакыру җибәрелгән булса, шулардан 11 -е генә килә алдылар. Укучылар әзерләгән концерт номерларын карап, укытучылар коллективы тарафыннан әзерләнгән табында сөйләшеп, аралашып утырганнан соң,аларга мәктәп коллективы әзерләгән кечкенә генә бүләкләр тапшырылды. Бу очрашу барлык катнашучылар өчендә бик кызыклы һәм файдалы булды. Хөрмәтле тыл ветераннары очрашуга килгәнегез өчен һәм кызыклы  һәм файдалы сүзләрегез өчен Сезгә зур рәхмәтебезне белдерәбез.

Язгы мәрхәмәтлелек атналыгының 22 нче апреле- Георгий лентасы көне. Бу көнне безнең мәктәп укучылары тыл ветераннарына үзләре әзерләгән бүләкләрне өләштеләр.

"Язгы мәрхәмәтлелек атнасы- яхшы эшләр эстафетасы" атналыгы кысасында,  безнең мәктәптә, 21 апрель- дуслык көне үткәрелде. Мәктәп укучылары өчен педагог-организатор  Минникаева Л.Н. тарафыннан презентация әзерләнгән иде. Укучылар дуслык турында презентация барышында бик актив аралаштылар.4-9 сыйныфлар өчен  зур булмаган тест үткәрелде, бу балаларны тагында җанландырып җибәрде. Укучылар  үзләре нәтиҗәләр ясадылар. 

"Язгы мәрхәмәтлелек атнасы- яхшы эшләр эстафетасы" атналыгын ачып җибәрдек. Укучыларны атналык эш планы белән таныштырдык. Логотиплар конкурсы уздырылды.  

Тирә- якны җыештыру буенча язгы ике айлык башланды. Шушы айлыклар кысаларында 18-апрель көнне безнең мәктәп укучылары , укытучылары һәм техник хезмәткәрләре мәктәп тирәсен калган кардан, иске үләннәрдән һәм чүп-чардан арындырдылар. Мәктәп яны матураеп чистарып калды.

"Илһам" бөтенроссия яшь язучылар бәйгесендә, "Өметле киләчәк" номинациясе дипломы белән бүләкләнде.

4 нче сыйныфта  ФГОС буенча белем сыйфатын тикшерү максатыннан бөтенроссия күләмендә уздырылган мониторингта безнең мәктәп укучылары да катнаштылар. Бу эшне безнең мәктәп  балаларның индивидуаль үзенчәлекләрен өйрәнү белән башлап җибәрде.15 апрельдән балаларның уку грамоталылыгын тикшерү, проект төзү эшчәнлеге буенча метапредмет биремнәр үтәделәр. 

Безнең мәктәптә 23- февраль һәм 8- март бәйрәмнәренә багышланган КВН үткәрелде. Уенда 5-9 сыйныф укучылары катнаштылар. КВНны педагог -оештыручы Минникаева Л.Н. әзерләде һәм уздырды. Уен бик эчтәлекле һәм кызыклы булды.  Җиңүче командага бүләкләр тапшырылды.

 2,4 сыйныф укучылары 8-март бәйрәме уңаеннан "Әнием-Алтыным" дип аталган кичә оештырдылар.Сыйныф җитәкчесе Шайсултанова Л.А.  бәйрәмне мәктәп күләмендә  үткәрде. Укучыларның әниләре һәм укытучылар кунаклар итеп чакырылганнар иде.Балалар Әниләренә багышлап монтаж һәм концерт номерлары күрсәттеләр.Әниләренә һәм укытучыларга үз куллары белән әзерләнгән бүләкләр тапшырдылар. Соңыннан бергәләшеп чәй эчтеләр. Бәйрәм барлык катнашучыларга да ошады.