2003нче елгы һәм аннан яшьрәк егетләр арасында уздырылган волейбол ярышышда безнең укучыларыбыз I урын алып кайттылар. Физик тәрбия укытучысы Рамазанов Ленар "иң яхшы тренер" дип танылды. 

Каникул чорында районда уздырылган мини футбол ярышларында 1998-1999 нчы елгы егетләребез III урын һәм 2002-2003 нче елгы егетләребез II урын яулап кайттылар.

Хөрмәтле милләттәшләр! Бүген Халыклар бердәмлеге көне ! 

Россия Федерациясе өчен чагыштырмача яңа булган бу бәйрәм бик зур тарихи һәм рухи мәгънәгә ия. Безнең халкыбыз моннан дүрт йөз ел чамасы элегрәк чит ил баскынчыларыннан Ватаныбызны коткарып калу хакына берләшә алган. Россиянең бәйрәмнәр календаренда – бердәмлек көче белән илебезнең бәйсезлеген һәм бөтенлеген саклап кала алган бабаларыбызның бөек батырлыгын бөтен халык тарафыннан тану һәм ихтирам итү көне бу. Илебезнең язмышы белән эчкерсез кызыксыну, аның тарихи үткәненнән тагын бер якты сабак алу омтылышы дәлиле бу. Халыклар бердәмлеге көне безгә, бүгенге чор буынына, тынычлык-татулыкта яшәп, бергәләп эш иткәндә генә көчле була алуыбызны искәртә. Халыклар бердәмлеге Россия Федерациясенең төп милли идеясе, аның куәте һәм иминлеге нигезе булды һәм шулай булып кала.

2005 һәм аннан да яшьрәкләр арасында районда  уздырылган шахмат ярышында 3 нче сыйныф укучысы Хайруллин Кәрим III урын алып кайтты.

Бүген мәктәбебездә Мәдәният дәресе уздырылды. Мәдәният дәресендә 17 балага “Беренче сыйныф укучысының мәдәни көндәлеге” бүләк ителде. Бу чарага Шубан авылы мәдәният йорты хезмәткәре Гатауллина Миләүшә чакырылды. Ул  балаларны республикабызның тарихи-истәлекле урыннары, төрле мәдәни чаралары  һәм рухи байлыклары белән якыннанрак таныштырды. Проект Татарстан Республикасы Мәгариф һәм фән министрлыгы ярдәме белән Татарстан Республикасы Мәдәният министрлыгы тарафыннан гамәлгә куелган.

Көндәлектәге төсле, заманча рухтагы рәсемнәр, кызыклы тарихи мәгълүматлар, укучыларның психологик һәм яшь үзенчәлекләрен истә тотып сайланган табышмак, кроссворд, иҗади биремнәр, чыннан да, нәниләрнең игътибарын җәлеп итми калмас. Алай гына да түгел, оештыручылар балаларны мәдәният дөньясы белән кызыксындыруның отышлы алымын да уйлап тапканнар. Укучы әти-әниләре, укытучылары белән никадәр күбрәк мәдәни чарада катнаша, тарихи-истәлекле урыннарга йөри, көндәлеген никадәр пөхтә алып бара – аның уку елы дәвамында республика күләмендә үткәрелә торган мәдәни конкурста җиңү ихтималы шулкадәр күбрәк.  Ә бәйге иң яхшы мәдәни көндәлек иясен һәм иң мәдәниятле әти-әнине ачыкларга ярдәм итәчәк. Җиңүче укучылар әти-әниләре белән Балалар “Әкият” үзәгендә уздырылачак мәдәни чарада катнашыр, дип көтелә.

Мәрхәмәтлек айлыгы кысаларында оештырылган, укучыларда әхлакый кыйммәтләр тәрбияләү, милләт һәм динара татулыкны ныгытуга һәм җәмгыятьтәге терроризм, экстремизм профилактикасына багышланган әңгәмәдә авылыбызның имам-хатыйбы да катнашты.

Күңелләребезне рухи яктан тулыландыруда, психологик-педагогик үзәк  белгечләренең хезмәте мөһим роль уйный.

Хөрмәтле коллегалар! Чын күңелебездән һөнәри бәйрәмебез белән тәбрик итәбез! Авыр, әмма мактаулы хезмәтебездә һәркемгә иҗади уңышлар насыйп булсын. Һәркемгә ныклы сәламәтлек, ак бәхетләр телибез. Бәйрәм белән!