Бүген башлангыч сыйныфларда ата-аналар җыелышы үтте. Сыйныф җитәкчеләре аларга ачык дәрес күрсәттеләр, ә 4 нче сыйныфта ата-аналар укучы балалары белән бергә ВПР эшләре эшләп карадылар. Икенче көн тәртибе буенча сыйныф җитәкчеләре ата-аналарны борчыган сорауларга җавап бирде, дәрестән тыш эшчәнлек белән таныштырды. 

Беренче яртыеллыкка йомгак ясап, ата-аналар өчен җыелышлар башланып китте. Әлеге җыелышларны башка еллардан үзгә итеп үткәрергә уйладык: һәр сыйныфта аерым ата-ана һәм укучы балалар катнашында. 5 нче сыйныфларда җыелыш математика дәресеннән башланып китте. Сыйныф җитәкчеләре, шулай ук математика укытучысы Хабибуллина Айсылу Мөбәрәкҗановна әти-әниләргә укучыларның белемнәрен күрсәтү йөзеннән дәрес фрагменты күрсәтте. Икенче көн тәртибе буенча әниләрне һәр фән укытучысы баласының өлгереше, дәресләргә әзерлеге белән таныштырып үтте. Ата-аналар бик канәгать калдылар, мондый җыелышлар отышлырак дип таптылар. 

Узган елга йомгак ясап, 2017 нче елга яңа максатлар, бурычлар билгеләр вакыт җитте. Каникулдан килүгә укытучылар коллективы беренче педсовет утырышына җыйналды. Утырышта беренче яртыеллыкка йомгак ясалды, ирешкән уңышларга бәя бирелде һәм җитешсезлекләргә анализ ясалды. Педсовет барышында Хабибуллина Айсылу Мөбәрәкҗановна һәм Ганиева Люция Фаезхановна ФДББС нигезендә яткан проект эшенең структурасы, әһәмияте турында чыгыш ясадылар. Укыту эшләре буенча директор урынбасары Ганиева Ләйсән Фәргатовна беренче яртыеллыкта эшләнгән эшләргә төпле анализ ясады, икенче яртыеллыкта планлаштырылган конкурслар, контроль эшләр белән таныштырып үтте. 

Мәктәбебез янында урнашкан каток бер дә буш тормый. Көндезге вакытта боз өстендә укучы-балалар шугалакта шуалар, ә кич исә беренчелек өчен көрәш башлана. Монда районыбыз авылларыннан, шулай ук күрше Биектау районы авылларыннан да хоккей командалары агыла. Алар үзара дуслык турнирлары үткәрәләр. 

Кышкы мәктәп яны лагерының соңгы көне. Алда укучыларыбызны кышкы каникуллар, күңелле яллар көтә. 

Лагерьда ял итүче укучылар Әтнә дәүләт драма театры артистлары әзерләгән "Яңа ел сайлаулары" дип исемләнгән тамашаны карадылар. 

Мәктәп яны лагерында балалар уйнап кына калмыйлар, төрле иҗади, спорт түгәрәкләрендә шөгелләнәләр. Шундыйларның берсе физкультура укытучысы Зарипов Булат Абдуллович җитәкчелегендә "Кызыклы шугалак".

Кышкы лагерьның өченче көнен балалар авыл китапханәчесе Вафина Луиза белән үткәрделәр. Алар Рафиз Корбан иҗаты белән таныштылар, китапханәгә сәяхәт ясадылар. 

Кышкы мәктәп яны лагерының икенче көнен укучылар файдалы итеп үткәрделәр. Алар инглиз теленнән мавыктыргыч уеннар уйнадылар, физкультура укытучысы Зарипов Булат Абдул улы күңелле стартлар уены оештырды. Шулай ук укучылар саф һавада хәрәкәтле уеннар уйнадылар: хоккей уйнадылар, шугалакта шудылар.