Хәрби-патриотик айлык кысаларында башлангыч сыйныфларда "Балалар күзлегеннән - Җиңү" рәсем конкурсы игълан ителгән иде. Укучыларның барысы да бу конкурста актив катнаштылар. Бүген конкурска нәтиҗәләр ясалды. 4 класс укучысы Кутдусов Р.Р. - 1 урын, 3 нче класс укучысы Гайнетдинов И.Р. - 2 урын, 1 нче класс укучысы Усманов Ислам - 3 урын.

Бүген, 20 нче февраль көнне, Арча шәһәрендә "Мәгариф идарәсе" оештырган "Туган телеңне өйрән һәм ярат" шигырь бәйгесендә безнең мәктәпнең башлангыч сыйныфлар укытучысы Кутдусова Г.М.  3 урын алды һәм диплом белән бүләкләнде. Хезмәттәшебезне котлыйбыз һәм иҗади уңышлар телибез!

 Кечкенәләр төркемендә рәсем эшчәнлеге.

Бездә бар буяулар:

Ак, кызыл, ал, зәңгәр,

Сарылар, яшелләр…

Ясыйбыз дәфтәргә

Бик матур рәсемнәр.

     15 нче февраль – совет гаскәрләре Әфган җиреннән чыгарылуга 30  ел тулган көн. Пешәнгер башлангыч мәктәп-балалар бакчасы укучылары һәм укытучылары авылдашыбыз Васыйл Әһлиуллинның каберенә чәчәкләр салдылар. 

15 нче февраль көнне Пешәнгер башлангыч мәктәп-балалар бакчасында очрашу кичәсе үтте.  Очрашуыбыз  ерак Әфганстан җирендә гомере өзелеп һәлак  булган  солдатлар һәм ул дәһшәтле  көннәрнең  шаһиты  булып  яшәүче  исәннәргә  багышланды.    Авылдашыбыз әфганчы Васыйл  Әһлиуллинның тормыш юлы, батырлыгы турында сөйләштек. Әфган җирендә башын салганнарны бер минутлык тынлык белән искә алдык.

Кичәдә сугыш кичергән, ул мәхшәрне үз күзләре белән күргән әфганчылар   Сабиров  Равил  һәм  Каюмов  Газинур  абыйлар катнашты. Алар үзләре турында сөйләделәр, укучыларыбызны  кызыксындырган сорауларга җавап бирделәр. Әңгәмәбез чакырылган кунаклар хөрмәтенә багышланган музыкаль номерлар белән үрелеп барды.

Балалар язучысы Роза Хафизовага 6 нчы февраль көнне 90 яшь тулу уңаеннан, Пешәнгер авылы китапханәсе хезмәткәре Сабирзянова Р.Н. балалар бакчасында тәрбияләнүче балалар белән очрашты. Ул нәниләргә язучы турында сөйләде, аларга язучының әкиятләрен укыды, әкиятләренә карата иллюстрацияләр күрсәтте. Балалар китапханәчене бик теләп тыңладылар.

Укучылар белән "Уттан сак булыйк" темасына тәрбия сәгате үткәрелде. Максаты: янгын куркынычсызлыгы кагыйдәләрен белүне ныгыту, утның җылылык һәм яктылык чыганагы гына түгел, саксыз эш иткән очракта күп бәла-казаларга сәбәпче булуын төшендерү, ут һәм көнкүреш приборлары белән сак, дөрес эш итәргә, янгын вакытында үзеңне дөрес тотарга өйрәтүдән гыйбарәт иде.  

 Балаларның сөйләм телен үстерү балалар бакчасында төп юнәлеш булып тора. Бу өлкәдә тәрбиячеләребез әкиятләрне сәхнәләштерү  алымын бик оста файдаланалар. Бүген дә шундый шөгыльләрнең берсе үтте.

8 февраль көнне  мәктәптә Яшь герой-антифашист көненә багышланган чара үткәрелде. Балаларга электрон презентация күрсәтелде, әлеге көн турында тарихи мәгълүмат бирелде һәм Бөек Ватан сугышы чоры балаларының батырлыгы турында сөйләнде. 

Мәктәптә эшләп килүче "Юл әлифбасы"түгәрәгенең һәр шөгыле укучыларның иминлеген саклау, юл йөрү куркынычсызлыгы турындагы белемнәрен тирәнәйтү максатыннан үткәрелә. Бүген дә чираттагы шөгыльләрнең берсе узды. Укучылар әлеге түгәрәккә бик теләп йөриләр.