Пешәнгер авыл китапханәсенең мәктәп-бакча белән бер бинада урнашуы бик уңайлы. Китапханәче Сабирзянова Р.Н. балалар тәрбияләүдә мәктәп-бакча белән тыгыз хезмәттәшлек алып бара. Менә бүген дә башлангыч сыйныф укучылары китапханә белән берлектә оештырган "Батарейка тапшыр!" акциясендә катнаштылар. Китапханәче укучыларга батарейканың табигатькә китергән зыяны, әлеге акциянең файдасы турында бик үтемле итеп сөйләде. Укучылар алып килгән батарейкаларын тапшырдылар, табигатьне саклауда үзләреннән дә өлеш керткәннәреннән канәгать калдылар.

Туган як табигатен саклау - һәркемнең бурычы. Педагогик коллектив алдында  яшь буында әйләнә-тирәгә сакчыл караш тәрбияләү, табигатьне сакларга, яратырга өйрәтү бурычы куела. Әлеге вакытта авыл китапханәсе белән берлектә "Батарейка тапшыр – керпенең гомерен сакла!" акциясе алып барыла. Китапханәче Сабирзянова Р.Н. батарейкаларны тапшыру пунктына килгән балаларга бик эчтәлекле итеп, әлеге эшнең асылына төшендереп аңлата.  Менә бүген дә балалар бакчасында тәрбияләнүче Мухаметзянов И. 25 батарейка алып килде, Рәйфә апасыннан керпе турында мәгълүмат туплап, үзенең табигатьне саклауга күпмедер өлеш керткәненә куанып чыкты.

   Әле бакчада өелеп кар ятса да, мәктәп тәҗрибә участогы өчен җаваплы педагог Кутдусова Г.М.  бакча эшләрен февраль ахырында ук башлап җибәрде инде. Дәрестән тыш эшчәнлек вакытында бу эшкә ул 4 сыйныф укучыларын да җәлеп итә. Помидорлар чәчелде, борыч  һәм баклажан үсентеләре күтәрелеп килә.  

Балалар бакчасында тәрбияләнүче нәниләр көндәлек режим буенча саф һавада күп уйныйлар, хәрәкәт итәләр. Саф һавада хәрәкәт итү матдәләр алмашын, кан әйләнешен тәэмин итә, аппетитны үстерә. Балалар каршылыкларны җиңәргә өйрәнә, җитезлектә, кыюлыкта камилләшә. Аларда хәрәкәт итү үсә, кәеф күтәренкелеге тотрыклана.

Менә бүген нәниләр кышны үзләренчә күңелле итеп озатып калырга теләк белдерделәр. Үз куллары белән Кар бабай ясадылар, аның тирәсендә күмәк уеннар уйнадылар.

Бүген дәресләрдән соң укучылар чираттагы "Юл әлифбасы" түгәрәгенә ашыктылар.

Юл аркылы чыкканда,

Уңга – сулга карарга

Өйрәтәләр мәктәпләрдә, мәктәпләрдә.

Светофорны тыңларга,

Кагыйдәне бозмаска

Өйрәтәләр мәктәпләрдә, мәктәпләрдә.

Бүген Пешәнгер башлангыч мәктәп-балалар бакчасында 8 Март Халыкара хатын-кызлар көненә багышланган бәйрәм чарасы үтте. Әлеге чара республикабызда игълан ителгән Эшче һөнәрләр елына бәйләнеп алып барылды. Әниләребезнең һәрберсе үзенең һөнәре турында сөйләде, укучыларга киләчәктә үз һөнәрен сайлауда ярдәм  итәрдәй файдалы киңәшләрен бирде. Укучыларның һәрберсе әниләренә багышлап матур шигырьләр, монлы җырлар, дәртле биюләр башкардылар. Әлеге бәйрәмне шундый эчтәлекле, балалар өчен икеләтә файдалы итеп оештыруда үз өлешләрен керткән өчен әниләргә рәхмәт белдерәбез.

Халыкара хатын-кызлар көне 8 нче Март якынлашып килә. Укучылар әниләренә үз куллары белән бүләкләр әзерләделәр. Балаларның нәни куллары белән, бөтен тырышлыгын куеп, йөрәк җылысын салып, башкарылган бу бүләкләр әниләрнең күңеленә хуш килер.

Наз гөлләре чыга үсеп

Сез үткән буш җирләрдән.

Алыгыз сез кабул итеп

Бу бүләкләрне бездән!

Кечкенәләр төркемендә тәрбияләнүче балалар "Геометрик фигуралар иле"нә   сәяхәт иттеләр. Эшчәнлек барышында тәрбияче нәниләрнең геометрик фигуралар һәм  төп төсләр турында элементар математик күзаллауларын ныгытты. 

Саулыгың бит үз кулыңда,

Чыгарма тик исеңнән.

Һәрчак хәрәкәттә булып

Яшә, эшлә бүгеннән.

Шул максатны алга куеп

Без үсәбез гөр килеп,

Һәр нәрсәдән ямь табабыз,

Яшибез җаен белеп.

Бүген мәктәптә чаңгы буенча ярыш үтте. Укучылар ярышта актив катнаштылар.

Бүген мәктәптә "Без бергә!" халык иҗаты конкурс-фестиваленең мәктәп этабы үтте.