24 нче январь көнне мәктәптә Ленинград блокадасы өзелүенә 75 ел тулуга багышланган чара үтте. Максаты - үсеп килүче буынга патриотик тәрбия бирү, илебез азатлыгы өчен корал тотып яуга кергән ватандашларыбызның исемнәрен мәңгеләштерү, яшь буында ватанпәрвәрлек хисе тәрбияләү. Чарада катнашкан укучылар тарих битләренә күз салып, дәһшәтле сугыш еллары, 900 көн дәвам иткән Ленинград блокадасы мәхшәрен сурәтләгән документаль фильм карадылар. Ахырдан исә фильм эчтәлеге буенча әңгәмәдә катнаштылар.

Балалар бакчасында үз-үзеңә хезмәт күрсәтү күнекмәләрен үстерүгә зур игътибар бирелә. Өлкәннәр һәм мәктәпкә әзерлек төркемнәрендә тәрбияләнүчеләр тәрбияче апаларга үзләренең уенчыкларын юарга булыштылар. 

Сәламәтлекнең нигезен

Хәрәкәт тәшкил итә.

Шуңа күрә безнең көннәр

Гел хәрәкәттә үтә.

Балалар бакчасында тәрбияләнүчеләр, тышта буран бөтен җирне карга тутырган, дип, уфтанып тормадылар, мәктәпнең  иркен спорт залына кереп, рәхәтләнеп уйнадылар.

Бүген мәктәбебездә ата-аналар өчен ачык ишекләр көне оештырылды. һәр класста ата-аналар алдында ачык дәрес күрсәтелде. Соңыннан икенче чирек нәтиҗәләре буенча җыелыш булды.

 Башлангыч мәктәптә өченче чирекнең физкультура дәресләре тулаем чаңгыда йөрүгә багышлана. Чаңгыда йөрергә өйрәнү балалар бакчасында ук башлана.  Бүген 4 нче сыйныф укучылары балалар бакчасында тәрбияләнүче нәни дуслары өчен чаңгы юлы салдылар.

Саф һавада кышкы уеннар дәвам итә. Бүген,  дәресләрдән сон, укучылар, күнелле һәм сәламәтлек өчен файдалы итеп, ял иттеләр. Укытучы Галәветдинова И.Р. таудан чаналарда шуу оештырды.

Өченче чирекнең беренче атнасында мәктәбебездә "Китапларга икенче тормыш бүләк ит!" акциясе булып узды. Укучылар мәктәп китапханәсендәге иске таушалган китапларны тәртипкә китерделәр. "Дәваланган" китаплар яңадан кулланылышка керде.

5 нче январь конне Пешәнгер мәдәният йортында "Кыш бабайда кунакта" дип исемләнгән чара булып узды. Бәйрәмдә мәктәп укучылары һәм балалар бакчасында тәрбияләнүчеләр катнашты. Төрле кызыклы уеннар матур җыр-биюләр, шигырьләр белән аралашып барды. Әлеге күңелле чараны оештырганнары өчен мәдәният йорты хезмәткәрләре Аскарова Р.М.га, Касимова Ә.Т.га һәм китапханәче Сабирзянова Р.Н.га олы рәхмәтебезне белдерәбез. 

28 нче декабрь көнне Хәсәншәех мәктәбендә район мәгариф системасы хезмәткәрләре арасында шашка һәм шахмат буенча зона ярышлары булып узды. Әлеге ярышларда безнең мәктәп-балалар бакчасы тәрбиячесе Мәгъсүмова Г.Х. шахмат буенча 2 нче урынны яулады. Хезмәттәшебезне котлыйбыз!