Мөндеш башлангыч мәктәбендә "Белем бәйрәме" тантаналы линейка белән башланып китте. Укучылар чыгышыннан соң,  мәктәбебез укытучылары, килгән кунаклар, әти-әниләр котлау сүзләре әйттеләр. "Беренче дәрес"тә укучылар Татарстан Республикасындагы кәсепләр, халкыбызның традицияләре турында белемнәр алдылар. Борынгыдан килгән тегүчелек, чигү, агач һәм тимер эшкәртү кебек һөнәрләр турында тыңлау аларга аеруча кызыклы булды.

Бүген район мәктәпләре арасында ярминкә һәм чәчәк күргәзмәсе үткәрелде.

Бүген район мәгариф хезмәткәрләренең традицион август киңәшмәсе узды. Киңәшмәдә узган уку елына анализ ясалды, яңасына бурычлар билгеләнде. Ел дәвамында төрле уңышларга ирешкән мәгариф хезмәткәрләре бүләкләр алды. Мәктәбебезнең башлангыч  сыйныф укытучысы Йосыпова Роза Кыяметдин кызы Татарстан Республикасы Мәгариф һәм Фән министрлыгының мактау грамотасы белән бүләкләнде. Роза Кыяметдиновнаны уңышлары белән ихлас күңелдән котлыйбыз!

Җәйге ялда тәрбияләнүче балаларда наркотикларны куллануга тискәре мөнәсәбәт формалаштыру максатыннан, авылыбыз фельдшеры Рәмзия апа балаларга "Наркотиклар-сәламәтлек дошманы" дип исемләнгән мәгълүмат сәгате уздырды.

Бүген лагерьның соңгы көне. Иртән 22 июнь - Бөек Ватан сугышы башланган дата уңаеннан класс сәгате узды. Укучылар һәйкәл янына барып сугышта ятып калганнарны 1 минут тынлык белән искә алдылар һәм алар хөрмәтенә чәчәкләр куйдылар. Традиция буенча ахыргы көндә татар халкының милли бәйрәме "Сабантуй" уздырылды. Укучылар кашыкка йомырка куеп, капчык киеп йөгерделәр, чүлмәк ваттылар, уенчык кистеләр. Иң матур биючеләрне, иң тиз йөгерүчеләрне һәм иң оста җырчыларны барладык. Бәйрәм бик күңелле узды.

Бүген Түбән Мәтәскә мәктәбе каршындагы "Кояшкай" лагеренда тәрбияләнүче балалар көнне Россия Федерациясе Һәм Татарстан Республикасы гимннары астында флаг күтәрүдән башладылар.  Иртәнге ашны ашаганнан соң укучылар белән мәчеткә кунакка бардык. Мәчетнең имамы Фазылҗанов Гамир Габделхакович балаларны мәчетнең тарихы һәм әдәплелек кагыйдәләре белән таныштырды.  "Гаилә - җылы учак" дигән темага класс сәгате узды. Укучылар белән аларның гаиләләре турында әңгәмә оештырдык. Көнебез файдалы узды.

Иртән  Россия һәм Татарстан флаглары күтәрелде. Укучылар саф һавада иртәнге гимнастика ясадылар.  Табигатьтә экскурсиядә булдылар. Бездә бүген "Юмор көне" булды. Укучылар кызыклы шигырьләр укыды, күңелле скетч куйды, рәсем ясады. "Көлке көне" турында әңгәмә узды. Ахырдан "Ералаш" карадылар. Көнебез бик күңелле булды. Көлегез, көлегез! Файдасы күп - белегез!

Иртәбез иртәнге зарядкадан башланды. Аннары балалар Югары Мәтәскә авылына экскурсиягә бардылар. "Гаилә бюджеты" дигән темага әңгәмә уздырылды һәм укучылар  шушы темага рәсем ясадылар. Һәр көнебез файдалы уза.

Бүген Түбән Мәтәскә мәктәбе каршындагы "Кояшкай" лагеренда тәрбияләнүче балалар көнне Россия Федерациясе Һәм Татарстан Республикасы гимннары астында флаг күтәрүдән башладылар. Иртәнге ашны ашаганнан соң укучылар белән авыл китапханәсенә кунакка бардык. Укучылар китапханә, китаплар белән таныштылар. Алар биредә борынгы әби-бабайларыбыз уйнаган уеннарны уйнадылар. Элекке уеннар балаларга бик ошады.

Бүгенге көнебез "Яшел утлар" диеп атала. Бүген безгә кунакка ЮХИДИ профилактика бүлеге җитәкчесе Мөхәммәтҗанова Энҗе Газизовна килде. Укучылар белән "Юлда йөрсәң, бул өлгер" исемле интеллектуаль уен уздырдык. Укучыларның юл йөрү кагыйдәләре турында булган белемнәре тикшерелде. Юл йөрү кагыйдәләрен төгәл үтик! Юлларда сак булыйк!  Барыбызга да исән-имин булырга язсын!