Белгәнебезчә, 5 апрельдән 30 майга кадәр агач утырту айлыгы игълан ителде. Бүген 7 класс укучылары Гәрәев Наил Назыйф улы җитәкчелегендә агач утыртуда катнаштылар.

Бүген бөек шагыйребез Габдулла Тукайның туган көне. Бу зур бәйрәмне укучылар һәр елны көтеп ала. Быел да бәйрәмгә әзерлек эшләре алдан ук төзелгән план буенча алып барылды. Башлангыч сыйныф укучылары Тукай бабайның әсәрләрен сәхнәләштерделәр. 1 класслар - "Эш беткәч уйнарга ярый", 2 класслар - "Кызыклы шәкерт", 3 класслар - "Бала белән күбәләк", 4 класслар - "Су анасы", " Фатыйма илә кошчык" шигырьләрен уйнап күрсәттеләр. Бәйрәмгә "Ромашка" балалар бакчасыннан нәни дусларыбыз килде. Кичәбезне "Туган тел" җыры белән төгәлләдек.

Тукаебыз туган көнгә багышлап 5-9 сыйныф укучылары газеталар чыгардылар. Һәрбере класс үз газетасын яклады. 6 класс укучылары чыгарган "Без Тукай оныклары" исемле газета  аеруча уңышлы дип табылды. Шулай ук 5нче, 7нче классларның да газеталары мактауга лаек. Ә иң оста яклаучылар - 5 сыйныф укучылары! Котлыйбыз аларны.  10 сыйныф укучылары Тукайның тормышы һәм иҗатына багышлап буклет чыгарганнар иде. Барыгызга да зур рәхмәт!

Габдулла Тукайның 128 еллыгына багышлап, мәктәбебездә бик күңелле кичә узды. Кичәдә 5-11 сыйныф укучылары, укытучылар  катнашты.  ГабдуллаТукайның иҗаты, тормышы турында тирән эчтәлекле чыгышлар, шигырьләр сөйләнде, Тукай шигырьләренә язылган җырлар җырланды. Соңыннан бөек шагыйребезгә багышланган "Безнең уен" интеллектуаль бәйге үткәрелде. Бәйгедә 7 сыйныф укучылары җиңеп чыкты. Без бөек Тукаебыз иҗатын яратабыз, укыйбыз, өйрәнәбез!

Бүген, башлангыч сыйныфлар арасында бөек шагыйребез Габдулла Тукайның туган көне уңаеннан викторина булды. Аны авыл җирлеге китапханәчесе Рәшидә апа үткәрде. Балалар Тукай бабаебыз хакында тагын да күбрәк мәгълүмат алдылар.  Ә җиңүчеләр - 3 сыйныф укучылары. Галиева Зәринә, Мокыймова Алинә, Фәйрушин Рәсүл. Котлыйбыз!

Актаныш янгыннан саклану оешмасының Тат. Суксу бүлекчәсендә ачык ишекләр көне булды. Безнең укучылар янгын сүндерүче абыйлар янында кунакта булдылар. Аларны укытучы Гәрәев Наил Назыйф улы алып барды. Укучылар биредә үзләрен чын янгын сүндерүчеләр итеп хис иттеләр. Мондагы хезмәткәрләр аларга үзләренең тынгысыз хезмәтләре турында сөйләделәр. Укучыларга бу экскурсия кызыклы да, файдалы да булды. 

Бүген 9 сыйныф укучыларының математикадан  сынап карау имтиханнары. Барлык укучыларга да уңышлар теләп калабыз.

Бүген безнең мәктәптә 5 мәктәп катнашында бик матур чара булып узды. Мари Суксу, Тат.Ямалы, Яңа Кормаш, Иске Кормаш мәктәпләреннән командалар эстафетада катнаштылар. Бу чара әле беренче тапкыр гына үткәрелсә дә, бик оешкан төстә, күтәренке рухта узды. Катнашучылар мондый матур башлангычның традициягә әйләнүен теләделәр. Мәктәпләр арасында дустанә аралашу ягыннан да, сәламәтлекне кайгырту ягыннан да, гомумән, бик әһәмиятле чара булуын барлык катнашучылар да бик яхшы аңлады. Нәтиҗәләргә килгәндә, 1 урын - Тат.Суксу, 2урын - Яңа Кормаш, 3 урын - Иске Кормаш мәктәпләре булды. Җиңүчеләргә мактау кәгазьләре һәм күчмә кубоклар тапшырылды. Оештыручы Нияз Галивка, физкультура укытучыларына бик зур рәхмәт! Мондый чаралар бик кирәк!

Апрель - Тукай ае. Мәктәбебездә бөек шагыйребезнең туган көнен билгеләп үтү чаралары башланып китте. Бүген 9 һәм 10 сыйныфлар арасында Г.Тукайның иҗаты һәм тормыш юлына багышланган "Бәхетле очрак" уены булды. Укучылар шагыйрьнең тормышы һәм иҗаты турындагы белемнәрен тагын бер кат барладылар. Кичә "Туган тел" җыры белән тәмамланды.